[GUEST]

#NSS社會

[[GUEST]] 疫情非常嚴重相信一句說話大家聽到都習以為常，喺唔同嘅新聞報道下面都見到有好多唔同comment講關於呢一啲事情。今日就想同大家分享一下我嘅睇法，亦都希望大家可以喺下面發表下意見，我預咗會俾人鬧㗎啦。如果大家有啲咩嘢想鬧嘅都可以盡情鬧我。有啲乜嘢講錯嘅，大家都可以喺下面留言糾正我。
首先我想講吓醫療方面，而家醫療床位不足，主要嘅原因都係因為醫療資源不足。見到新聞話一個護士對120個病人，人手唔夠其實唔係一個藉口，香港應該都有一啲退咗休嘅護士，可能有一啲唔願意出嚟幫手，但係希望幫到手嘅就幫下啦。再者要一啲已經病咗嘅人瞓喺條街度咁多日，天氣都開始凍，開始落雨，係咪應該幫下佢哋。盡量搵吓適合嘅地方比佢哋。香港咁多酒店，係咪都可以搵一啲足夠條件嘅去用嚟放住呢一啲病人。而家又話救護車唔夠，其實已經搵咗差唔多超過300架的士去幫手，其實都可以搵埋一啲旅遊巴，喺同時你都可以令到佢哋有得開工。亦都有講到救護員不足，其實係咪可以搵一啲有救護員資格嘅警察，可以幫吓手。香港警察咁多，係咪真係唔可以分一啲嚟幫吓手呢？
打針呢一方面，以下一番內容我唔係批評緊打針，只係想喺呢一方面發表下意見，最近打針放寬到三歲以上嘅小朋友都有得打(four 興)。見到有某議員提議喺雪糕車入邊打針，其實有冇諗過呢一個方案非常之荒謬，根本侮辱緊香港小朋友嘅智商。我作為一個中學生都覺得呢一條計一定唔得。小朋友見到雪糕車自然會想入去，入到去發現要打針嘅會唔會為小朋友增加左一個陰影。你又話會用一啲食物去安慰呢一啲小朋友，其實有冇諗過香港小朋友唔係咁蠢。如果你真係要佢哋打嘅話，咁點解唔搵一啲比較有經驗嘅護士，或者一啲比較有耐性嘅幫小朋友打針，可以一個比較放鬆嘅態度幫佢哋打針，咁唔係會令到小朋友更加唔抗拒打針咩？同埋有啲小朋友其實真係好細，雖然政府話已經減低劑量俾小朋友打。其實有冇諗過有啲小朋友身體比較虛弱，有啲比較強壯，佢係咪應該跟返個年齡分返呢?雖然我知道呢一個方面政府應該幫唔到太大嘅手，不過我都想講吓呢一點，永遠唔會知道小朋友會唔會有負面反應，同埋我想有一句說話比頭先嗰個議員，小朋友都冇你咁天真，你咁樣只會令小朋友對打針有負面感覺。
喺檢測方面，睇新聞知道有好多人為咗想有更加快嘅檢測結果，不惜自己攞錢去做檢測。其實點解會有呢啲事發生呢？唔係話起咗嗰個咩咩實驗室喺香港咩？點解都仲係唔夠？而家強檢條件已經降低咗好多？我之前就做咗最後尾嗰一批要做強制檢測而大廈只係得一個人中，嗰陣都排左差唔多四至五個鐘，我相信應該有人長過我好多。而家其實人龍已經少咗好多，疫情嚴重，政府唔幫下呢啲市民，有一啲自己攞錢做嘅其實都係做緊一啲低收入工作，佢哋為咗要返工都要攞嗰$240甚至更多去做檢測，係佢哋嘅眼中呢$240已經好多㗎啦。政府可唔可以諗吓辦法，唔好再坐住過腦。
係呢個疫情底下其實我哋都發現都有好多有心人，好多值得我哋敬佩嘅醫護人員，甚至呢一啲自願去車確診者嘅司機。其實我自己就會預咗自己一定會中，隨時都一定會輪到自己，都唔係大家想像中咁嚴重。喺呢一場疫症下，其實都發現到香港有好多問題，不過呢一啲問題就係呢一個時刻一次過爆晒出嚟。疫情底下已經有好多自己曾經熟悉嘅店舖，都因為收入問題而結業，其實都非常之可惜。我想問吓政府，你係咪想繼續袖手旁觀，好似扮緊做緊嘢，但係其實冇一樣野係啱用？以事論事，問題出喺邊度？可唔可以唔好再治標唔治本，認真係搵個方法出嚟解決？
醫護人員加油！香港人加油！
Sor for 1999