#NSS社會
[GUEST] 講下自己少少睇法
各地政府管治好佢哋嘅地方去操作,政府嘅權力會按照佢哋奉行嘅政治體制所產生，例如民主國家嘅民選政府就得到人民嘅授權去管理國家，職責都係維持社會秩序、改善民生同保障人民生活嗰啲啦
in fact :政府喺國家管治上嘅行政角色,不過呢個層面只係最表面嘅操作，正如你頭先所講嗰啲咩維持社會秩序、改善民生同保障人民生活，全部都涉及龐大嘅資源開支，能夠操縱資源靠嘅從來都係錢，但係錢喺邊度嚟呢？所以，管治權力核心嘅來源，由古至今都係嚟自一樣嘢，就係錢
社會問題唔係用錢就可以解決到,『問題』就好似物理學入面對天下間所有物質嘅定義一樣，佢唔會消失，只會轉化，所以所謂『解決問題』其實只係一個『轉化問題』嘅過程啫，簡單咁講，例如一個政客嘅競選承諾係要解決『問題甲』而贏得民心，當佢執政之後為咗解決『問題甲』就將『問題甲』變成『問題乙』，到社會對『問題乙』嘅不滿累積到不容忽略嘅地步時，佢就用『問題丙』去解決『問題乙』，最後，當『問題丙』成為眾矢之的，佢就會再用返『問題甲』去解決『問題丙』，以此類推。
以說穿了，社會問題永遠都係喺一個循環中不斷演變，就係離不開由政治生態所衍生出嚟嘅民生、經濟、環境問題，當權者就睇下開邊瓣而去出牌，而非建制或非執政嘅政黨同政客亦都會同時間打出唔同理念嘅旗幟，嚟吸納被忽略嘅一群以凝聚分化社會嘅力量，不過其實正反兩邊都樂見呢個天下大亂嘅情況，因為大家從來都清楚如果一個社會無問題嘅話就大家都無得撈，社會問題越多就代表佢哋嘅存在價值越高，所以『烏托邦』只能夠喺小說入面出現
面對競爭、等種種威脅，現實嘅生活情況一代艱難過一代，當社會上有為數唔少嘅人因為呢啲循環又循環嘅社會問題而處於持續不滿同不安，喺社交媒體嘅催化下自然就會孕育出一種極端化嘅民粹，加上充滿劣根性嘅人類喺民主制度中就等同於由無知嘅大多數去決定國家嘅命運，民粹主義就更容易被政客所利用，政客要執政只需要討好呢班憤怒嘅選民，打出嚟嘅政綱不外乎都係關係到我頭先講嗰三樣嘢，民生方面就例如提高社會保障、經濟方面就例如增加就業機會、環境方面就例如改善居住質素等等，呢啲講出嚟就好動聽，個個聽到都拍爛手掌，但係其實每一粒都係糖衣毒藥，所以佢哋每一項看似為咗解決社會問題嘅政策，其實目的就只有一個，就係保障金字塔頂層嘅利益
政府其實乜 Q 都唔識做，佢只係一個幫大家儲住啲錢嘅巨型『豬仔錢罌』，頭先講嗰啲有邊樣係可以憑政府一己之力去做？提高社會保障要靠保險同基金公司，增加就業機會要靠各個企業，改善居住質素要靠發展商，小到就算去鋪返好條路、裝返盞路燈，咪又係由承建商去做？所以所謂嘅德政，未見成效首先要達到嘅，就係要大幅增加政府嘅公共開支，目的就係用唔同嘅名目，去讓商家們共同去劏呢隻大家有份辛辛苦苦儲肥嘅『豬仔』
醫療同消防，係政府為人民提供最基本嘅服務,當人民要求更好嘅服務時，佢哋咪可以大條道理買更好更貴嘅設備
個錢罌有錢畀人分都已經係好好架啦，好多國家搞到入不敷支就唯有發債，用國家未來嘅勞動力嚟借錢找數，借返嚟啲錢你話最終又會落咗喺邊個袋度？德政真正得益者係邊個？搞到政府債台高築嘅係咪糖衣毒藥
好簡單一個現象，而家環球總資產值比起五十年前漲咗差唔多成六十倍，但係點解全球嘅超級富豪人數無類似嘅增幅
証明咗一直以嚟，貧者未必越貧，之不過富者肯定就越富，極少數人控制大多數資產嘅基本局格從來都無變過，而社會上既得利益者更利用政治制度去維護佢哋嘅絕對優勢，所以無論係咩政府上場，或者邊個人執政都好，呢啲優勢都不曾受到動搖，因為如果法規同政策係為咗建立更公平、更公義嘅社會而訂嘅話，點解貧富分配不但未平均過，近十年甚至出現中產向下流嘅情況？咁你話我哋嘅領袖同政客，佢哋究竟係真心想解決問題？抑或只係將呢個不公平嘅機制一直咁一代一代延續落去？
所以，五十年前嘅超級富豪，五十年後嘅今日佢哋仍然都係超級富豪，我夠膽講將來再五十年、一百年、甚至係五百年後，佢哋嘅後人、後後人都係
環球經濟體係一個『共榮圈』,環球經濟都係由歐美主導，亦即係話任何一個國家如果要喺呢個經濟體入面分一杯羹，就要埋歐美堆成為佢哋嘅盟友，以世界總生產值到而家已經發展到超過 70 兆美金
呢 70 兆就係代表地球上任何一個人佢哋喺呢個系統所賺、所花或所儲嘅每一分每一毫，亦即係話，除非你同錢扯唔上任何關係，否則歐美領袖國就可以透過貨幣政策去影響你
我頭先所講『環球經濟體嘅主人』並唔係話歐美領袖國，更加唔係指任何一個國家嘅總統，而係指金字塔最頂層，嗰班設計出整個金融系統，並透過銀行同貨幣政策去控制住呢個龐大『共榮圈』嘅一小撮人，佢哋至係當今『環球經濟體』真正嘅主人
班人擁有地球上最龐大嘅企業、最優質嘅資產同最珍貴嘅資源，掌握人類文明各個領域尖端嘅科技同技術，就係呢少於 0.00001% 嘅人穩坐喺金字塔頂尖，千秋萬世操控住腳下 99.99999% 人口嘅財富同命運，每分每秒無間斷享受住數以三十億計嘅勞動人口因推動呢個經濟巨輪而衍生出嚟嘅直接利益，再透過通漲去竊取每一個人辛辛苦苦儲返嚟嘅購買力