#NSS家庭
[WYC] 標題：重男輕女
內容：希望 admin sd 出去。是咁的，小妹今年 18歲，有個16歲細佬，由細到大我都唔覺得屋企係一個重男輕女嘅家庭，因為佢地對我抑或細佬都好好，唔會話特別偏重任何一方，但慢慢我發現，佢哋係重男輕女，不過冇話特別嚴重，但我依然好失望。
講明一下先，我就係小康家庭，父母喺香港有兩個物業咁，而事源父母年齡越來越大，佢哋最近就開始討論以後財產點分，比我哋多又比細佬幾多。初頭，佢哋就話留三百萬畀我，其餘嘅錢同物業就全部畀細佬（分別係700呎同900呎左右嘅私樓），我就冇乜意見啦， 因為細佬以後娶老婆可能要用好多錢？所以我唔介意分分少啲。
但係後來某日， 父母又無啦啦話，不如所有遺產畀細佬啦，跟住佢哋問我好唔好，我忍唔住直接爆咗句：明白，嫁出去嘅女唔重要，我冇意見呀。然後佢哋就同我講，梗係唔係啦， 你成績咁好，搵工比較輕鬆，前路唔需要擔心， 嫁出去又有男方養，反觀細佬，成績一般， 我哋擔心佢以後冇飯開呀。我聽到個下心諗：成績好唔等同於搵工輕鬆， 高學歷唔等於搵到高薪，係女都唔一定嫁得出，嫁得出又憑乜要靠男方養？仲有，就算細佬以後冇飯開，你係怕我唔會養佢定係點？
Anyway， 比曬細佬我都冇意見，我只係唔憤氣佢哋點解會咁樣諗，可能真係我小心眼同唔成熟掛，純抒發，補充一下：撇除呢樣父母對我都好好， 我同細佬關係都好好。
Sorry for 1999