#NSS個人
[GUEST] 26嗰日，當晚睇住張家朗奪冠嘅直播，作為一個勉強都可以算係運動員嘅學生，當下嘅感受係為張家朗奪冠而開心，但同時令我反省自己。
從小一開始，游水就充斥係我嘅生活之中，但我成日都偷懶，一個禮拜五日嘅訓練就只會去得三日，甚至更少，年紀越大，情況越嚟越嚴重。結果就係只能做個唔上唔落嘅人，同我同年嘅年年都有進步，我同佢哋嘅差距就年年增加。雖然好唔抵，但係自己攞嚟，又有咩好怨。抱著呢種諗法，我漸漸減少咗訓練，直到依家係停咗兩年冇去過泳池。
但當我睇到香港嘅運動員係奧運上大放異彩，甚至攞到金牌，我嘅心係想返到泳池，好想再掂到嗰啲好難聞嘅泳池水，好想係學界攞到獎，而唔係永遠跟係人哋後面，做嗰個被同年、細個我嘅人取笑嘅人。
不過依家問題嚟啦，我冇再跟泳會，即係唔會有教練執到我嘅動作，淨係可以自己練。加上準備中四，學業上可能有啲難跟。不過又唔想係學界中完全冇所作為。
所以問下大家意見，區隊嗰啲都唔會去諗，淨係想係中六學界前游到30秒內（依家大概34上下，但係兩三年前嘅成績），自己去泳池自己操，會唔會有成果？
識得勿相認！:P