#NSS家庭
[kyc ] 大家好，呢篇文主要係想問大家一啲嘢同埋少少發泄
小妹而家升F.2 ，但係我覺得屋企人好似當我係一個初小學生咁樣，好多同學都話我太受保護。
例如
1.明明放學有好多條路可以行，但必須要行佢指定嘅路，唔可以行人太多或者人太少嘅地方(近食肆或者小巷都唔得)
2. 放學要即刻返屋企，唔可以去商場、唔可以去7-11或者circle K買嘢
3.高中之前唔可以約朋友出街 如果真係要，阿媽要同我一齊，而且要係區內活動
4.上大學之前唔俾拍拖(應該好多人都係咁㗎啦，但係佢每逢見到啲中學情侶，阿媽就會指指點點，大聲咁同我講唔可以好似佢哋咁樣荒廢學業，真係好唔識尊重人囉)
5.有一次遲咗放學、遲咗返屋企，手機又唔小心交咗靜音，跟住阿媽同阿婆每人分別打咗10次電話，跟住仲話如果我仲未聽嘅話就要報警(但係其實我只係比平時遲咗10分鐘返屋企)
6.仲有一次阿婆喺app見我嘟左卡，但係仲未返到屋企，所以就狂打電話。我同佢解釋係因為我同啲friend喺學校門口傾偈，跟住佢就鬧我話可能會有啲壞人會帶走我，叫我一係喺學校傾一係返屋企傾(但係其實每次喺學校傾，阿婆都會狂打電話嚟問點解我仲未出學校門口)
我有嘗試過同屋企人講，用同學同我嚟做一個比較，但佢話唔好同班唔讀書嘅人一齊比較啦，佢哋都唔讀書，成日都出去玩。仲警告我話唔可以同佢哋做朋友，要專心讀書考全級頭3，最後再補多一句話因為我同佢哋坐埋一齊，我先至會讀書咁差。(但係其實班同學只係追星，冇做壞事，而我都有全級十幾)
其實我只係講咗一小部份，不過我覺得冇必要再講更多。我想問吓各位睇完呢篇文之後覺唔覺得我係太過受保護？如果係，有啲咩方法可以改善呢個問題？