#NSS社會
[Guest] 呢篇野係我自己嘅諗法，可能會有好多人唔同意我，你可以鬧我，不過希望你可以睇落去。篇野有d長，請見諒。
唔知大家有無follow立場或者眾新聞嘅ig呢？我有follow，有時無聊會開ig睇下佢地嘅新聞post，不過下面d留言真係令我覺得有d唔舒服。
就例如上次嘅鄭州水災，應該大家都知，呢件事中共就話係百年一遇嘅大洪水，咁相信精明嘅大家都會覺得呢件事係人禍而唔係天災啦，個班政府高官之前講過話要將鄭州打造成海綿城市，將鄭州嘅排水系統打造成一流嘅排水系統，點知嚟個大雨就搞到成個城市死曬。成件事都係中共班無能嘅高官而造成，咁點解係眾新聞嘅ig post留言下面，會有班人反而笑遇到洪水而遇難嘅鄭州市民係抵死？佢地可能有支持過警察打壓黃絲，但係佢地係中共嘅洗腦下根本無自己嘅想法，只係一味愛國愛黨，佢地根本唔知事實，點解要話佢地抵死，五毛？佢地嘅留言就好似班藍絲話爆眼少女俾警察射爆對眼係假嘅，係黃絲自己搞件事出嚟誣衊警察咁樣。班藍絲如果係咁嘅話，點解我地要學佢地？點解我地唔可以做一個有質素嘅香港人，而要好似班藍絲咁樣做d咁無品嘅野？
第二，前幾日dse放榜有幾個狀元出咗嚟，我地應該為佢地覺得開心至真，而且佢地仲要係咁多傳媒面前表態自己係黃，咁我地應該無咩可以鬧佢地。咁點解仲會有班人，會叫佢地返大灣區，話佢地唔出去外國讀書就話人地愛國愛港，出去外國讀書就話人地放棄香港，係度話咩違反國安法，我想問個班留言嘅人諗緊d咩？每個人有唔同嘅諗法，佢地鐘意點咪點囉，你地理得人地咁多姐？
第三，關於上次個bb要人捐肝嘅事，ig下面留言嘅人真係令到我好心屈，佢地起曬bb個媽媽底出嚟，發現佢支持香港警察，就祝佢個bb搵唔到肝，抵死咁樣。的確可能我自己真係無能力捐，但我地都可以祝福佢媽媽幾句，但點解連祝福都無，反而仲要咒人地？同啱啱鄭州水災件事差唔多，點解我地要好似班藍絲咁無品？我地咁樣嘅舉動就會令其他無咁偏激嘅香港人更加討厭我地，希望大家仲有d人性可以講返d正常d嘅野。
有時係ig會見到d藍絲留言，其實大家都有言論自由，唔同嘅人有唔同立場，可能大家政見唔同，一見到藍絲就鬧，話人地係五毛藍絲，但係而個方法係無用，只會令對方相信自己個套，我地係要同佢平心靜氣咁講自己嘅想法，先會令人信服，亦會令一班無咁偏激嘅藍絲開始轉黃。
如果太長嘅話應該無人會讀落去，我講著咁多先，總結想講希望個班係ig下面留言個班人可以睇到呢個post，唔好咁噁心，可能你會想鬧我，鬧我係大中華膠或者左膠甚至五毛，無所謂，每個人有自己嘅諗法，亦可以表達自己意見，多謝你睇到呢度。