#NSS家庭
[某間Band1女校] 長文慎入
我真係忍左好耐，但係唔知點講出口
我家庭比較特別(?)父母年紀差距比較大，我阿媽係大陸人，因為佢細嗰嗰陣屋企窮，我外公外婆細佢十幾歲就去左天堂，佢要自己一個照顧頭家同我舅父
唔知係咪因為捱左太多苦，加上踏入更年期（大概45），尼兩三年佢啲脾氣真係差左好多。自問自己由細到大都算係乖乖女，冇煙冇酒，成績中上。但係我可以開始感覺到佢想將我綁係佢身邊，有種控制緊隻洋娃娃嘅feel
佢好少比我同我啲朋友出街，無論係去行街、迪迪尼，佢都唔放心，覺得幾個中學生，仲要係女仔冇大人陪著好唔安全。如果要出街，佢一定要跟住我，搞到我啲朋友、同學都覺得好尷尬，導致我成個初中都冇點同啲朋友出過街（佢地可能都唔夠膽再約我）
係我小學一年級嘅時候，我阿媽識左一個住係隔離座嘅人，對方都係大陸人（下稱A)，咁啱佢個仔都係我嗰間小學，大家就慢慢熟悉。後嚟我搬屋，差唔多每次去佢地屋企，我地都會留宿。因為好熟+細嗰唔介意，我同佢個仔訓過同一張床。但係到我十三四歲嘅時候，我開始抗拒，因為個男仔真係好宅，同我冇共同話題，而且每次去佢地屋企，我阿媽都抌低我一個人係客廳，然後自己同A出街，我一個人好無聊又尷尬。於是我就嘗試同阿媽講可唔可以唔住，但係我阿媽次次都威脅我「你如果唔去，你以後都唔可以出門」然後成個禮拜都黑晒面，大力放杯，大力閂門搞到我完全冇rights，佢話做咩我就要做咩，唔夠膽再說「不」
到我中學，我阿媽啱啱踏入更年期嘅時候，有次佢又叫我去佢地屋企，我終於夠膽say no，我話我去樓下親戚屋企溫書，你應該都放心啦，點知佢一巴星打落嚟，話：做人唔好太過分，人地邀請你去，你細個嗰陣又咁照顧你，你依家話唔去即係唔比面人地，但係我真係驚左佢地屋企，所以最後死都唔出門，打電話比我老豆同我契媽。佢地知道之後同我阿媽解釋我唔係唔比面，青春期男女有別，然後又同我講佢地明白我嘅委屈，但都係叫我體諒佢，因為佢細個捱苦唔容易，依家更年期情緒唔穩定，我老豆又已經年過七旬，得我阿媽可以照顧我，我應該要多多理解佢
其實我都明白我阿媽唔容易，因為我老豆長年在外工作，一年見得一兩次，選擇用錢去補父愛，見親就係問成績，所以十幾年嚟都係阿媽陪我，我完全冇體會過咩係父愛同一家三口。屋企得我同佢，而佢又冇咩朋友，我就成為左佢嘅出氣口，佢一睇到啲咩新聞就會爆粗，「垃圾人、去*啦、d**m、尼啲人就應該五馬分*、有病」之類（粗口已盡量*左）尤其係係我中三嗰陣因為課業同溫書好攰想安靜下，佢會冇啦啦入我房然後對著我狂鬧新聞上嘅某個人，搞到我有排情緒唔穩定，放學要見社工，番屋企唔想想講嘢（p.s我間房嘅門鎖被佢拆左，佢話驚我鎖左自己出唔番嚟🤦🏻♀️）
我都想體諒佢、理解佢，但係我都係一個人，點解唔可以理解下我。啲人成日話獨生女好呀，掌上明珠，但其實冇幾個人知我見過社工。家庭係咩感覺，我從來都冇體會過
所以想擺上嚟分享，想問下我可以點同我阿媽溝通/點樣同佢講我嘅心事
sorry for 1999