#NSS家庭
[Guest] 其實抑鬱症患者係咪一定成日喊 呆 懶？
家屬可以點幫抑鬱症患者？
點樣預防抑鬱症患者嘅自殺行為？
我有一個阿妹 佢f4 我f6. 佢今年一月確診咗Major depressive disorder. 以我認識嘅抑鬱症 患者應該係思維遲緩 行為緩慢 懶 成日喊 活動量少 .但我阿妹嘅行為丶情緒係我嘅角度嚟睇唔似抑鬱症患者 .差啲咁講 其實我覺得佢比較似一個痴線.甚至因為咁懷疑醫生係咪誤診.
從我平時嘅觀察 我係佢身上唔係好睇到我所認識抑鬱症患者嘅行為 反而仲有啲相反. 首先我從來冇見過佢或聽過佢係街丶學校情緒失控丶喊. 反而幾正常 識笑. 亦冇聽過有人覺得佢有抑鬱.但係返到屋企佢又成日鎖自己係房 飯又唔食 .一有人同佢講嘢 佢就會鬧人唔好煩佢. 成日出房之後就鬧屋企嘅物品 有人掂佢佢有會縮開 即刻沖入房換衫. 極度失控.完全同係出面嘅狀態唔同.其次
佢講嘢丶行路感覺完全冇障礙咁 .有時仲超快. 再者 我根本感受唔到佢懶 感覺佢仲努力過考DSE嘅我. 佢成日通宵溫書丶做功課 叫極都唔停.第二日直接返學 .基本上每星期至少一日冇瞓過 .每日起碼凌晨四點先瞓 .但其實已經同學校溝通咗唔需要佢做功課 甚至評估都可以唔需要.但真係冇人可以阻止到佢.而佢亦冇失眠嘅問題 .反而有啲嗜睡. 佢復活節假基本上每日都可以瞓20個鐘以上.所以我排除咗佢因為失眠所以索性做功課嘅可能.而佢通宵帶嚟嘅攰其實勁明顯 對眼紅哂 會瞌眼瞓.有時父母叫佢停嘅時候都見到佢好痛苦咁趴係張枱上面 想拎支筆都拎唔到咁 .我實在諗唔到明白點解佢會咁做. 最後 呢一次佢真係令我非常震驚 令我完全懷疑佢係咪痴線. 有一日我貪得意走咗入去間房 去咗佢張床嘅上格到瞓. 一直到夜晚 我突然聽到一吓砰門聲嚇醒咗 .係我阿妹返咗屋企 .佢冇開燈. 因為已經係夜晚嘅緣故 所以間房勁黑. 佢開咗首好down 嘅歌 狂loop .我偷望咗一眼 佢望住道門坐 喺度發呆. 過咗一陣之後 我聽到佢係咁講對唔住對唔住對唔住 .我又望落去 佢縮埋左一舊 攬住自己個頭 好似有人要害佢咁. 過咗一陣 佢入咗衣櫃 跟住又出返嚟. 但係佢出咗嚟之後 我發現佢瞓咗係地 .過咗一陣我又聽到啲拍拍聲 係佢摑緊自己塊面 佢之後仲一路笑.
之後佢又拎咗把鐵尺打咗自己一陣 跟住佢仲狂撞頭 真係聽到啲聲都覺得痛. 之後我見冇乜聲 我再望落去 發現佢喺度咬紙巾. 過多一陣 佢入咗廁所 我先即刻走咗出去.佢啲行為勁恐怖 唔講我真係以為佢鬼上身.
如果咁樣係抑鬱症患者正常嘅行為 我想請問下究竟點樣先可以幫到佢 .其實見到佢咁我都好心痛好無助 . 但係醫生教嗰啲乜嘢帶佢出去玩 畀佢食好嘢嗰啲根本冇用 . 佢成日應承咗我哋出去玩之後 過咗一陣又反口 . 就算係朋友約佢 佢都唔太想出去. 令外我見佢平時起身都幾痛苦 朝朝早都畀父母拖落床 就算係放假都係咁 佢次次都爬返上床 然後話唔補習唔返學 最嚴重仲會喊 . 但過咗一陣佢又會自己平復返 .唔講嘢 換衫返學 補習. 佢都自殺未遂過三次 .雖然離最後一次自殺已經過咗三個幾月 但我感覺佢未放棄 . 我完全諗唔到點樣去預防.想請問下有經驗嘅大家 我究竟可以點樣幫佢呢 ？
唔好意思可能有啲唔清楚🙏🏻越寫越激動🙏🏻