#NSS家庭
[GUEST] 我真係好憎我阿爸
我阿媽因為病咗所以辭咗職，而屋企又要供阿哥去外國讀書(我阿媽供，我阿爸冇比過任何費用)所以我屋企嘅經濟就雪上加霜，我阿爸又只係每個月畀$1000家用，根本就唔夠洗。我小學嗰個呈分試考衰咗，派咗去一間校風超級差嘅學校，但係我阿媽又唔想我入去學壞又唔肯畀我讀直資，所以就叩咗一間離屋企好遠嘅一間學校，一個月車費都要$800。而我阿爸就一直係喺度話自己嘅嘢自己搞，使咪要家長操心。
喺中學度，我好爭氣，成績都一直有頭五，但係我阿爸就一直話band 3 咋嘛，頭五又點啫？ 再後來，我拎到全級第二，佢又話band 3 第二又點？ 佢每日將個band 3 掛喺嘴邊，搞到我好自卑好大壓力。
喺日常度，我由小五開始有手機，但佢一直唔畀我阿媽買流動數據畀我，所以佢一心情唔好或者睇我唔順眼就熄wifi，唔畀我用手機，我開番佢又熄番。平時我同阿哥一齊玩online game，我阿爸就會鬧我話我阻住我阿哥休息。又成日叫我執嘢(枱上面D垃圾，浴缸上面D頭髮…..)，但係明明就唔係我搞出嚟嘅，我唔肯佢就扯我出去(有一次畀佢扯甩咗條褲)，成日話要踢我出門口，又話到咗18歲就即刻搬出去。做功課上網課又唔畀開燈 閂門。成日揼我D嘢，叫我買間3000尺嘅屋，再自己擺，屋企冇位比我。
喺我興趣方面，喺我細細個就開始跳舞，跳咗7年，但係佢暪住我阿媽打咗電話比跳舞嗰度話以後都唔跳。今年我開始學小提琴，佢就開始一直勸我阿媽唔好畀我學，嘥錢。