#NSS愛情
[GUEST] 長文慎入
小妺係bi，最近有件事令到我好煩惱，我唔知我係咪鍾意咗一個我唔應該鍾意嘅人。上年暑假我識到佢，佢都係女仔，開頭識佢嘅時候都對佢冇乜好感，仲覺得佢有少少煩成日黐埋嚟整我。由於我冇乜朋友，但係佢又好熱情、好好人成日Send message搵我，咁佢就變咗我平時唯一會傾偈嘅人。我同佢越嚟越熟，成日同對方講笑，就好似有時我講錯嘢激嬲咗佢(佢唔係真係嬲 係講笑)，咁我同佢道歉，佢就會話我叫佢老公嘅話就唔嬲。咁佢要我叫佢老公咪叫囉，反正都係講吓笑。佢平時臨瞓前會同我講老婆晚安，咁我都係覆返晚安，但係唔會叫佢老公，因為我覺得無端端叫佢老公好似好怪(嗰陣時我仲未鍾意佢)。
開頭我哋都係叫下對方老公老婆咁，但係去到後來我哋WhatsApp講嘅嘢越嚟越曖昧，會同對方講我愛你，又會話我哋拍拖咁，仲有其他不過我唔寫啦。嗰時我已經開始鍾意佢，每日都好期待佢同我傾偈、講晚安，如果佢冇搵我嘅話我會唔開心，但係我唔知點解我又唔夠膽主動搵佢。
我唔知佢係咪真係鍾意我，雖然我哋平時傾偈嘅內容好曖昧，佢亦都話自己係bi 嚟。其實我都唔知佢同我講嘅嘢係認真定講笑，我問佢係咪真嘅時候佢會答係，但係我始終都係覺得佢同我講緊笑。(我唔知係咪我太多疑) 有次我哋傾電話嘅時候，應該大概講到拍拖嗰啲嘢嘅時候，我記得佢講咗一句「但係你係女仔嚟」，呢句我好深刻，我諗咗好耐都唔知佢呢句嘢嘅真正意思。究竟佢嘅意思係因為我係女仔所以佢唔會鍾意我？定係因為我哋係女仔所以喺香港好難拍到拖，屋企人都會反對，所以冇得拍拖？
另外，佢而家只係初中學生，已經拍過一兩次拖，我唔係覺得細個拍拖唔好，但係我覺得細個可能仲未清楚自己鍾意啲乜，可能佢未必真係鍾意我。因為我希望拍拖係一件認真嘅事，而唔係玩玩下。我相信每個人都希望自己嘅愛情可以長久，都唔希望大家一齊咗好耐先發現原來自己唔係真係鍾意對方。
去到最近佢同一個男仔一齊咗，佢喺WhatsApp度同我講，我好唔開心但係嗰時我上緊zoom要開cam，如果喊出嚟嘅話一定俾人睇到，喺等落堂嗰一個鐘入邊我都有繼續同佢傾偈，但係我成個身係震晒咁，一落堂我就即刻忍唔住爆喊，跟住嗰幾日都勁頹，去到嗰刻我再次發現自己真係鍾意咗佢。既然都已成定局，我咪祝佢同佢男朋友99，但係佢就話想同我99，咁我問佢點解要同佢男朋友拍拖，同我一齊咪得，佢就話因為無聊得滯，仲話我哋一齊嘅話佢可以同佢男朋友分手。 你講到你好似唔係特別鍾意你男朋友咁，我唔知你咁樣講係咪因為你唔想我再問你關於呢啲嘢，定係其實你真係唔在乎呢段感情。你平時成日都話鍾意我，但係到頭來你又同左另一個男仔一齊，如果你唔鍾意我啲咪直接同我講囉，唔使俾假希望我，咁樣只會令我更加放唔低你。
無論你係咪真係鍾意我都好，你做咩決定我都會支持你。如果你真係鍾意佢係話，咁我祝你地99，我會自已慢慢放低你。如果你只不過係太無聊而同佢拍拖嘅話，我希望你有一日知道我真係鍾意你，我亦都希望你平時同我講嘅每一句我愛你都係真嘅。如果你睇到呢篇嘢嘅話，而你又唔係真心鍾意你男朋友，咁我勸你哋快啲分手，畢竟我覺得愛情呢樣嘢真係唔可以攞嚟開玩笑。最後，我想同你講老公，我愛你。
Sor for 1999 中文差
多謝每一個睇到呢度嘅人 你哋每一個comment我都會睇