#NSS個人
[GUEST]
我覺得自己真係好賤。
小妹今年14，有過抑鬱症，試過自殺。依家已經好咗好多，但係由兩年前開始一直都有自殘，戒唔甩。
我自殘唔算秘密，除咗父母之外，朋友同學嗰啲都冇刻意瞞，所以身邊同我傾得熟嘅都知我有自殘。
其中一個知道我自殘嘅朋友識咗3年，一直都知佢好叻好有自信，尤其係唱歌樂器嗰啲都好勁。佢同我仲係同校，我知佢係鬼妹性格所以喺學校唔受歡迎，同埋成績唔係特別好，所以冇乜朋友。
我同佢做到朋友係因為我哋兩個都喺校外有參加同一個劇團，因為本身都識，所以喺劇團都自然熟咗。我好欣賞佢嘅自信，唔似我咁成日咩都唔敢講唔敢做。我亦都好羨慕佢咩都handle到，好樂觀又有才華。
但係近排佢突然同我講佢開始自殘，因為佢都知我有自殘，所以有一日喊住打電話俾我問我點算好。佢之前一直好努力勸我唔好自殘，但係我唔知點解好似一早預咗佢都會搞到咁，冇覺得驚訝。我嗰日同佢講咗兩個鐘，佢最後係咁多謝我，話我真係好好。
上星期我哋劇組分咗角色，佢係主角之一，而我又係做路人。話冇唔開心一定冇可能，不過我從來都冇做過主角，其實都預咗。但係唔知點解我知佢呢排心靈好脆弱，見到佢分到好角色咁開心我好妒忌。我之前都經歷過好多一樣嘅情況，但係從來冇試過咁憎佢。
於是嗰日我一直唔理佢，佢開開心心嚟搵我傾偈我都係hea住佢。我見佢好明顯好失望，但係跟住又去搵劇團啲師姐玩，我更加憎佢，喺心入面係咁咒佢。
之後成個禮拜佢啲whatsapp dm我全部唔理，喺學校見到佢我當佢透明，嗰啲時候就會覺得好開心，忍唔住想笑。
我都覺得自己好變態，但啱啱呢個禮拜係我難得一直可以維持住好開心嘅一段時間。我真係好唔想搞到其他人憎我，但係真係控制唔到，我覺得咁樣玩好開心。希望各位俾啲意見我點樣控制住自己唔好傷害其他人，唔該晒大家。