#NSS學業
[[GUEST]] 希望admin post我，唔該admin。小妹係上次投稿話擔心揀科嗰個，即係呢個post #NSS210324U4。
首先我好想同大家講聲多謝，好多人都畀咗好好嘅意見同埋建議我。當初我係覺得入精英班先係最好，入唔到精英班就等同好似廢人一樣，真係唔知點解當初會咁樣諗。呢排我睇完comment之後，再同我老豆好仔細咁樣傾過，最後諗通咗。你哋講得啱，入唔到精英班唔代表升唔到大學，相反地，入到精英班亦都唔等於可以升到大學。我驚升唔到大學嘅主要原因係因為比較多師姐師兄話我哋呢間學校嘅A/B班老師教得好差，咁當然唔代表全部嘅，咁但係大部分都唔會好得去邊，我係擔心呢方面。
其實小妹一直都有一個小小嘅習慣，其實呢個習慣都係中一下學期甚至最近先開始…因為我好鍾意中文呢一科，有時自己無啦啦心血來潮會想作文，又或者喺考試之前按番我哋中文卷二嘅考試範圍嘅題型去作文，作完之後就交番畀教我中文嘅老師去改，佢好好人。呢次考試嘅前幾日之前我作咗三篇文畀佢，佢即日覆我。
當初我冇諗過佢會畀分數或者好詳細嘅評語我，因為我中一下學期喺暑假嘅時候，我作咗篇文，無啦啦唔知點解好想畀嗰個中文老師改，然後我交咗畀佢，佢大概隔咗三四日後就改返畀我，但係評語唔可以話詳細，佢亦冇畀分數我，可能因為嗰陣時佢覺得唔重要啦。咁的確嗰篇都只係我心血來潮嘅作文，亦都過咗考試。咁今次的確唔同嘅，佢即日幫我睇完三篇文然後畀一個勁詳細嘅評語&分數我之餘，仲鼓勵我，真係好warm，但係我就聽到有啲師姐師兄話教A/B班嘅老師不論係中文定英文就算你自願畀文佢改，佢可以係隔一個星期都改唔返嗰篇文畀你，精英班嘅話就大部分都係即日或者隔一兩日都會畀番篇文你，所以其實我會比較擔心我入唔到精英班嘅師資問題。
我亦有好仔細咁樣諗過，其實係咪真係為咗入精英班谷住就一定要揀M1/M2呢？我哋要讀一年先可以drop科，如果第時真係畀我咁好彩入到文學同埋中史，呢兩科本身已經係比較難嘅，要做較多準備功夫，要勤力，始終呢兩科都好多嘢背，如果要我去讀多一科M1/M2，其實真係會好辛苦…
雖然而家冇咗一定要入精英班呢個念頭，但係反而好擔心真係入到中史或者文學班嘅話自己會搞唔掂。而家我嘅中文成績話好唔好話差唔差(？自己認為一般，雖然名次係全級中上，但係我覺得好多時候都只係撞彩…甚至覺得自己係一pat爛泥。中史的話，我相信咁多位如果有睇上一次我投稿嗰個post都知道，我f.1好憎呢一科，係到中二上學期先開始鍾意，我見到有啲comment話其實低form冇咗中史基礎都唔緊要，高form係會重新教過，唔需要擔心咁多。但係我最近上網睇完呢一科嘅syllabus，見到佢高form嘅中史課程真係好多(對於我嚟講)，好擔心自己背唔到咁多嘢，好擔心自己嘅手速handle唔到，擔心好多好多。諗好多好多。請問有冇take中史或者文學嘅人可以分享一下自己嘅感受，又或者畀啲建議我有咩方法去改進我嘅手速，令我自己嘅記憶力變得更加好？呢兩科又有啲乜嘢要注意？好想有讀呢兩科嘅人畀到啲意見我。
我上次個post亦都有提及過自己將來想成為一位中文老師，但係我又覺得呢個夢想或者目標好難實現，成日都覺得自己冇能力做到。小妹想做一個中學嘅中文老師，並返回母校任教。好想入中大嘅中文系，但係又好驚唔得，一諗到想做中文老師就好絕望，成日都喺度幻想，但係一諗起現實，就成個人都絕望咗。覺得冇可能，甚至會覺得將來出咗嚟做中文老師係喺度害人，中文成績唔好就出去教書。其實我小學六年我都好憎中文呢一科，中文成績唔好。係升到中一比一個中文老師影響我，中一下學期就開始好鍾意中文呢一科。我唔知小學六年好憎中文嘅我對中學(中文)會唔會有些少影響，因為我小學中文成績唔好，但係我而家都會盡力去考好中文呢一科。不過就覺得將來做到中文老師嘅機會率好微，成日都喺度諗，好唔開心，好大壓力。可能你哋會話唔好諗到咁遠住，但係有時候唔知點解我真係控制唔到我自己唔諗呢啲嘢，每一日都喺度諗，真係好辛苦…(呢一段純發洩)
最後，好想再次感激上次睇曬一篇長文嘅你哋，我知我嗰篇都比較長，但係好感謝你哋咁有耐心睇曬佢，從而喺comment嗰度安慰我，為我打氣，畀意見我，真心謝謝🙇♀️🙇♀️🙇♀️ sorry for 1999