#NSS個人
[GUEST] 我係個好唔鍾意講野、平時好靜但係熟咗好吵好奇怪、勁慢熱同怕醜嘅人。
未熟之前比人嘅感覺好內向，平時老師叫我出去答問題或者發表感受嘅時候都好緊張，心跳得好快，我唔鍾意人哋擺注意力喺我身上，就算得小小都好，只要我覺得我成為咗部分人嘅焦點，我就會好唔自在好緊張。所以無論老師係表揚我定係鬧我，我都好唔中意。
過年見親戚老豆叫我打招呼，但係我都係唔太敢打，真係唔知邊個打邊個，驚叫錯。 就算識咗好耐嘅朋友嘅屋企人，我已經成日喺佢屋企住幾日，成日約出嚟食飯都好，只要係同大人交流我都會好緊張
我平時其實有好多嘢想表達想講，但無奈冇乜朋友可以比我傾計
一、怕打擾到人哋
二、我一講就會講唔停，又唔想佢格硬答我
三、我覺得比人知太多嘢好似唔太好，但係又好想人哋了解我多d（我真係個好矛盾嘅人🤧）
所以我就開始咗打日記或錄音喺手機度比自己睇同聽，我覺得如果未來我再聽番宜家d錄音都幾有趣，加上又可以表達番自己d感受出嚟，我覺得幾唔錯💩
我之前都係度投過稿，我仲突登unfol咗呢個page先，怕人哋知係我，就算佢哋問到，我都可以話我唔知有呢個page存在。
見到其他同學去廁所都好鍾意拉住個人一起，但係我覺得有個人喺出面聽住我屙尿d聲會覺得好尷尬，就算阿媽阿妹都係一樣。
小學嘅時候手指中間成日都生嘢，我阿媽話係濕疹，雖然冇睇醫生亦都唔肯定係唔係濕疹，但係真係好痕好痛好辛苦，手上就有達好樣衰嘅痕跡係度，所以嗰時都唔太咁申隻手出嚟，但係升咗中學之後好似就好咗好多。 我覺得係真心朋友嘅有3個，其中一個係細細個屋苑識嘅熟到宜家，其中兩個就係中學識嘅，但係細細個識嘅宜家好似越來越疏遠咁。雖然係同一間中學，但係佢細我一年，加上小學唔同學校所以平時冇乜共同話題，但係中學之前我哋有好多嘢傾，乜都傾。宜家好似變咗咁，可能係我變咗，我都有發覺我小五開始好似就收埋咗自己，唔知咩原因，可能係因為我自卑冇自信？加上我頭髮天生卷，平時睇上去好爆，又唔高，黑眼圈大，額頭好似有塊淺淺嘅黑印，成塊面好似好黑好冇氣息咁，加上我皮膚比較黃，PE堂之後，就算冇臭味都好，都唔會太近其他同學。就算平時冇出汗都唔會癡同學太埋。之後我身形又冇話特別好，把聲又唔太好聽，動作有笨拙，我覺得我成個人就係差到一個極點。
我有試過做負離子，做完嗰一兩年自信係好咗嘅，但係之後幾年頭髮生出嚟就變咗上面卷下面直，但係又想留長d頭髮，所以搞到幾奇怪
同埋我髮量多又長，做一次價錢唔平，加上最近肺炎，所以呢三年都冇去整。
我就覺得自己全身缺點，本來小學成績全級前10左右，中學真係比小學難，真係求及格就好，及格就好開心，所以就連學業方面都冇埋信心。校服又著得唔好睇，把聲又冇話太好聽，一講開嘢就講唔停（所以宜家先打咁多💩）頭髮又亂，成績又差，性格仲比朋友話過好奇怪。雖然我照鏡覺得我五官還尚算可以，算端正，但係見度影出嚟嘅我，瞬間覺得自己超樣衰，究竟鏡入面嘅樣係真嘅定影出嚟？所以因為咁，我小學畢業都冇點影相，宜家諗落幾後悔。
不過頭髮就真係冇救，點整都會爆d出嚟，睇落好亂，夾仔又夾唔曬，屋企有燙頭髮嘅嗰個夾夾，夾完係有好d，但係番番下學又會亂番，可以點搞？
見到班同學基本上都已經熟咗一堆，唔想突然加入去
一嚟、唔夠佢地同大家咁熟，驚最後都係被人冷落嗰位
二來、我真係唔識同人相處，唔識睇人眉頭眼額，熟咗講野就好直接，真係驚得罪人，所以真係唔敢去識朋友。
宜家就有三個人嘅友誼。成日都話三個人嘅友誼唔長久，因為總會有人被忽略，但係我唔認為咁樣，雖然真係成日會有兩嘅後面行，一個前面嘅情況，去主題樂園d座位都係兩人座，有d堂要兩人分組都係要漏一個人出去。
但係我覺得總會攞到個平行嘅，平時大家對大家都好好，有時我同你一組，有時佢同我一組，大家輪流，我反而比較擔心之後分班，大家唔同班，班上活動嗰d總要有班熟d嘅frd，大家圈子唔同，班同班之間好似冇乜交流，大家揀嘅科又唔係太一樣，佢地都想揀理科，我就對理科一d興趣都冇，我又唔擅長交友，真係唔知點算。
你哋睇完呢篇嘢會唔會覺得我係個奇怪嘅人？
大家都係點樣識朋友之後同佢哋變熟？
你哋覺得同一個人做朋友最重要係咩？
會唔會介意外表成績嗰d？
如果我講野太直接係唔係唔太好？
最迫切嘅問題：
有冇人同我一樣天生卷頭髮？
大家有冇d咩頭髮多而爆嘅扎頭髮方法？
加上我好多短嘅頭髮毛毛扎唔到點算？
多謝大家睇到呢度