#NSS其他
[Guest] 想知大家平時係點處理人際關係上嘅問題
我自己採取嘅方法主要係溝通，我一路以嚟都係咁樣處理人際關係上嘅矛盾，自問覺得好有效，將大家嘅諗法都講出嚟，可以針對性咁解決因為誤會而發生嘅問題，亦可以避免因問題長時間擱置而令關係破碎。
但搞清楚，呢種溝通絕對唔可以俾佢演變成嗌交，必須要避免因好勝心導致爭論對與錯，咁樣只會令矛盾加深。我奉行嘅溝通，係一種輪流將自己嘅感受、見到嘅嘢、希望對方去做嘅嘢一一講出嚟，由於係輪流表達，我認為咁樣可以令雙方嘅立場更加平等，亦可以更加理性地討論件事。
但最近我遇到一個人[下稱A] 我唔能夠透過溝通解決矛盾，改善我哋之間嘅關係。我覺得我唔能夠透過溝通來解決問題嘅最大原因係我根本唔能夠明白佢嘅感受，應該話佢所講嘅道理我完全唔能夠理解，可能係因為咁我哋好難達致一個完整嘅對話。喺溝通嘅過程入面佢好容易有好大嘅情緒起伏，甚至喊。咁樣令我好困擾，雖然我知道情緒嘅控制可能對於一啲比較感性嘅人係好難嘅，但當佢變得情緒化，唔能夠理智地溝通，我就認為問題唔能夠得以解決。所以當我發現佢做出情緒化嘅行為，我就會將對話帶過去一啲輕鬆少少嘅話題帶過去，諗住下次再傾，但正正因為咁，我哋嘅問題一路拖延，好似令情況變得更加惡劣。
我知道喺處理人際關係上會遇到好多攔路虎，而我自己亦都遇到過唔少，但以往嘅每一次都能夠以一個真誠嘅對話作為開始，將問題慢慢解決，而且令我哋嘅雙方嘅關係都變得更加好。但係呢一次我真係遇上難以跨過嘅牆壁，我好重視佢，唔希望失去佢呢一個朋友，唔知大家有冇方法可以幫到我？
Sorry for 1999