#NSS學校
[GUEST] 大家好，以下係A0少女暗戀心事+長文系列。
有興趣嘅客官就請留低，聽聽故仔。
因為係現實中唔方便同屋企人朋友訴苦，所以選擇係網上講出嚟。
同埋算係為依段暗戀收結。
我高f,今年鐘意左個補習社嘅男同學。
我哋都係小學補到依家，但都係到今年先開始有交流，因為佢之前唔太肯同人講嘢，但高f之後佢變咗肯同人講嘢。
我從來冇諗過我會鍾意佢，因為我係家教嚴嘅乖乖女，阿媽唔俾我打機（當然私低下會偷偷打）而佢係成日打機個種（注：f4後肉眼可見勤力咗讀書，所以唔好誤會佢係瘋狂打機，佢係打機好勁，大佬級）
一開始我都覺得自己應該唔係鍾意，可能係因為好奇。
但後來，佢認真學野嘅時候，用把低沉但又少少嗲嘅聲音叫個師兄陪佢打機嘅時候，溫柔咁同其他人講唔該嘅時候。
如果發生係其他人身上。我會覺得冇嘢。
但由佢做出來，好似好唔同，
好溫柔，好可愛。
甚至有次佢應該係打機輸咗，忍唔住細細聲講咗句粗口，我都覺得好可愛。
佢有時候嘅毒舌都好可愛。
同埋同佢相處好舒服，之前同曾經嘅暗戀對象相處會不自覺地緊張，有壓力，但同佢嘅話，雖然有少少緊張，但係好自然舒服。
其實佢令我改變左好多，我好慶幸鐘意過佢。
因為佢，我開始學識唔再好似以前咁將每一件事都極度甚至過分著緊。
例如我以前如果比平時遲咗5分鐘，20分先出門口會好驚好驚遲到，依家30都還好，唔會再咁驚慌失措。
例如考試或者生活遇到難題或者好負面嘅嘢，都會學佢，同自己講問題唔大。
我可以安穩情緒正常樂觀面對高中生活，好多時候都係因為，「問題唔大」。
自己都變得從容好多，人生方向都有調整。
講返佢啦，之前都有為咗同佢拉近距離而用d學習方面嘅籍口加左佢電話（佢應該冇加我做聯絡人），然後試過自己通過共同frd搵到佢ig 名，之後fol 左（佢可能因為public account 嘅緣故冇fol 到）
（以上加電話加ig 我都係考慮好耐花咗好大勇氣先敢做😂）
但做完依d冇幾耐，開始出現佢拍拖嘅傳聞。
又話佢變哂look 勤力咗因為女朋友。
同埋佢哋被人撞到過。
雖然佢一開始唔認，話係家姐。
但大家話好似情侶。
我係好細膽，個陣聽到之後，過咗一排覺得既然人哋疑似有女朋友，自己又未鍾意得咁深，無謂鐘意落去，徒添煩惱。
之後我親眼見到傳說中嘅疑似女朋友
係舒服溫柔型女仔，同佢確實登對。
雖然事後佢話只係家姐
個陣我已經放低左，驚嘆過後，心諗，好彩放低左，如果唔係心一定好痛。
但原來心痛是注定的
避得初一避唔過十五
我之後又作死地在意返，鍾意返。
因為佢仲未親口承認，所以我仲抱住一絲希望，賭佢冇女朋友。
但係，當我哋難得有一刻四目相對嘅時候
係佢答我佢條女同佢唔同校嘅時候。
我想像過無數個四目相對嘅時候，但冇諗過會咁痛。
痛左好耐。
我知道今次，真係要放低啦。
有少少唔服，追都未開始追。
算啦，鬼叫我咁遲先知你咁好。
個女仔一定好好，可以令你開始努力讀書，可以令你開始同人交流，可以令你成為更好嘅自己。
希望依位咁有眼光，又咁幸福被你選擇成為女朋友嘅人，好好珍惜你。
希望你幸福。
一定要幸福呀，你。
一定一定一定要呀。