#NSS愛情
[Guest] 對唔住 我欠你一個道歉。
希望admin可以post ig，當係比我懺悔嘅機會，對唔住。
你中意我，其實已經好耐之前。以前中意我嘅你，會成日關心我、喺我面前出現、成日笑、好開心，會同我講生日快樂、考試加油、關心我嘅一切。可惜，當時嘅我只係覺得煩厭，甚至覺得你嘅付出好好笑，好on9，唔明點解有人可以咁蠢，盲目為一個唔中意自己嘅人付出又唔計較，成日同人嘿嘿哈哈喺背後笑你，你明知我唔中意你，都要繼續中意我。不過對我嚟講，你嘅出現、關心已經令我習慣咗，但因為果時嘅我覺得你中意我就預咗無回報㗎啦，一切都係你自願，我就覺得一切係理所當然，無對你有任何表示，繼續冷淡對你，繼續好enjoy你嘅討好。
後來，你唔知係sense到我嘅冷淡，定係知道我只係當你兵、笑你，定係咩原因，你開始離我而去，我心入面好似有啲嘢唔見咗咁，覺得好唔自在，有時會留意下你點解有咁嘅轉變，但係發覺我再無喺你口中或者身邊聽到關於我嘅嘢，我望你嘅時候你唔再望我，我就知道，你已經唔再中意我。
唔知點解我好唔甘心，特登做啲嘢引你注意，例如特登望實你，你同人講嘢會插話，同你參加一樣嘅嘢，或者有啲好引人注目嘅行為，希望令你繼續中意我、理吓我。原本我以為我只係中意“你中意我”，但後來有人提起你個名，我個心跳得好快，震左一下，我先發現原來我中意咗你，但係咁又點呢，無論我做乜嘢，你已經唔會再中意我。
我知道自己好pk，唔知你有無討厭我，不過討厭我都唔緊要，i deserve this，係我自作自受。我有好多野想同你講，不過已經無機會，你再唔係果個成日喺我面前出現嘅開心果，已經靜、成熟左好多，如果係因為我帶比你咁大傷害搞到你有呢個改變，對唔住，可唔可以喺我面前做翻一個開心嘅小朋友？
失去咗，先了解你嘅好，而家再無人會好似你咁關心我、愛我，我覺得後悔莫及，好空虛，先知你帶咁多快樂比我。其實我知道一切已經太遲，如今我哋嘅錯過，都係由我對你嘅冷漠、唔珍惜開始，我唔知點解以前會覺得愛一個唔愛自己嘅人係一件可笑嘅事，所以不斷踐踏你，而家風水輪流轉，報應落喺我身上，先發覺其實中意一個人係無錯，真係願意放低自己，盲目為佢付出而唔計較值唔值得，雖然可能係有少少傻都好。
睇住你越嚟越靚，越嚟越好、叻，卻再唔會為我停留。我知我為你帶嚟好大傷害，甚至係好難磨滅嘅烙印、陰影，我知我令你好唔開心好消極，對唔住一直以來對你嘅冷淡、卑鄙嘅行為，都唔奢求你回頭再中意我、望我一眼，但係，你可唔可以原諒我？
最後，我愛你。