#NSS其他
[GUEST] 大家好，喺嚟度想同移咗民/去咗外國嘅人講聲加油。以下落嚟想講嘅嘢有啲長，想分享吓自己嘅感受/經歷，希望大家唔好介意。
小妹今年06，9月嘅時候嚟咗英國。我可能同某啲人一樣，嚟英國係屋企人嘅決定，我冇得揀。有陣時睇到有啲投稿都係講英國/移民，好多人都有唔同嘅煩惱，我睇到嘅時候都覺得好有同感，原來唔係得自己一個經歷緊嚟啲嘢。
有啲人話嚟到英國真係成個人頹晒，我都唔例外。我喺香港係一個活潑好動嘅女仔，會成日約朋友出街，同佢哋好好傾，亦好少放負，朋友都話我幾好相處。嚟到英國之後我經常收埋自己一個，可能係因為唔習慣或者唔開心，但係我由9月收埋自己到依家，當然啦學都係要返嘅，其他時間都係喺房自己做自己嘢，拒絕同人溝通。喺嚟個時候屋企人成日同我講：「出去識多啲朋友啦，你咁樣唔得。」每次聽到嚟啲類似嘅時候我都當聽唔到，因為我覺得係廢話，我夠知道我要識朋友（小妹喺學校係有朋友嘅，只係除咗返學之外就冇任何交流。）有陣時我同我香港嘅朋友Facetime佢哋都會留意到我個樣頹咗好多，由外向變內向，其實嚟個都算係一個幾嚴重嘅問題。有陣時同佢哋傾傾吓計都會喊咗出嚟話好掛住以前嘅時候，然後佢哋都會安慰我話：「我哋等你返嚟！」
其實除咗嚟度嘅生活令我好頹之外，學業都係一個好大嘅問題，相信喺外國讀書嘅大家都會明白我講咩。06嘅我原本應該讀Year 11，但係怕自己跟唔上進度所以我降級讀Year 10。英文就肯定唔洗講，點會夠local嚟，英文文學真係唔掂，啲文章分析完全唔明，中文啲文章我都分析唔到，何況英文。數學我係冇問題嘅，因為應該嘅數學比較簡單。然後我學校係要Geo Hist其中一個揀一科，我揀咗Geo 就大鑊。我覺得Geo真係完全唔係人讀，因為首先你要英文好。有陣時見到自己嘅成績好差就會好自卑，產生一種諗法覺得自己好廢，然後就會想放棄，開始厭世，頹上加頹。
仲有唔少post係講long唔longd好/唔想同男朋友分手，我都經歷過。我中三開學開始同男朋友一齊，直到8月尾我過嚟英國。我同男朋友一直都相處得好好，冇乜大問題，甚至我覺得我係可以同佢一直行落去，因為大家都好鍾意對方。但係幸福嘅時間總係過得快，當我知道自己要過嚟英國嘅時候我真係晴天霹靂，我第一樣諗嘅嘢就係我係咪要同我男朋友分開，雖然佢話佢會等我，但係我唔想，因為longd真係好辛苦，我亦怕浪費咗佢嘅時間，即使我哋大家都愛住對方，我哋最後決定分開。我好清楚我依家仲愛住佢，但係我冇嘢可以做到，我好想搵佢，至少我想知道佢過得好唔好。希望我有一日返返香港有緣嘅話可以同返佢一齊。如果有人係考慮緊long唔longd好嘅話，我覺得如果大家都好愛對方嘅話係可以longd嘅，睇情況之後嘅事之後先算，因為相信你唔會想失去一個好愛你，你又好愛嘅人。加油，longd完咗你哋就係一世。
英國嘅生活真係唔容易，嚟度真係好大壓力，我自己有陣時諗返起以前香港嘅生活都覺得好無力，之後就會喊咗出嚟，一個禮拜有幾日都係咁，但係只要我哋一日都生存緊，我哋都要努力生活落去，只要記住你唔係自己一個，會有好多人經歷緊同你一樣嘅嘢。「想喊就大聲喊出嚟，想嗌就大聲嗌出嚟。」當我壓力大嘅時候我就同會自己講嚟句嘢。捱過咗嚟啲生活，你想去邊就去邊，做咩就做咩，冇人可以再管住你。喺嚟度生活嘅你真係辛苦晒啦，我哋一齊加油！