#NSS個人
[GUEST] 麻煩晒各位辛苦做嘢嘅Admins~🙏🏻
小妹今年f.3，f.3要揀科，自自然然就會有壓力，但係我學業進度跟唔到，功課又做極都做唔晒，又要追返喺上次exam落後嘅成績所以要成日溫書，一啲休息嘅時間都冇，屋企人又成日都煩住我，搞到我個人好忟，再加上自己本身情緒已經唔係好穩定，搞到我呢排壓力爆煲，但係又唔係好識點樣去釋放啲壓力(本人有追星，但係追星嘅時候只可以忘卻當時嘅煩惱，喺做返平常嘢嘅時候嗰種心塞嘅感覺又會返返嚟)，所以近排情緒都好低落
喺有一次我摸緊自己條頸嘅時候(唔好問我點解要摸條頸，我都唔知)，自己嘗試捏住自己條頸，我莫名覺得好爽，但係當我意識到自己做緊啲咩嘅時候，啲眼淚標晒出嚟，唔係因為抖唔到氣，都唔係因為痛，係因為我覺得自己已經有自殘傾向，啲壓力搞到我好似有少少問題，我唔係話自殘係問題，但係自己當下係覺得，我已經去到呢一步啦，我應唔應該要同父母講(父母知道我壓力大，但係唔知我情緒開始有啲問題)，但係我又驚我阿媽擔心過頭(佢自己本身都有情緒病)，我好驚佢覺得係佢自己照顧唔好我，所以我先會搞成咁，之後佢自己個病又可能嚴重咗，所以我一直都唔夠膽同佢講，然後我又係嗰種可以自己搞掂嘅就唔會搵人幫手嘅人，我亦都係嗰種唔係好想人哋關心自己啲私人嘢嘅人，而且我驚我啲負能量會影響到佢哋，所以到而家為止，我都冇搵過任何一個人求助/幫手
但係喺琴晚發生咗件事，我喺臨瞓前聽一啲放鬆嘅音樂，等自己可以易瞓啲，喺佢播其中一首歌嘅時候，我嘅情緒好似跳咗掣咁，成個人突然變到超sad，之後就忍唔住爆喊，然後我個心又好似俾人抽咗上嚟咁，嗰種感覺好奇怪，心口嗰度會好那，用力㩒住個心口先至好返少少，跟住仲會呼吸困難，成個人震晒，行路好似會飄起咁，我喺崩潰之後個人冇嚟精神、冇晒力，行路要扶牆，拖住隻腳行路，總之成個人就係好唔對路啦
最後其實我想問下我應唔應該同父母講？如果要講，應該要點講？我份人唔中意講自己嘅敏感嘢，所以我唔知點算。同埋有冇人試過有嗰種個心俾人抽咗上嚟嘅感覺，可唔可以分享吓你哋嘅經歷，唔該晒🥺
sor for 1999
錯字勿屌🙇🏻🙇🏻