#NSS其他
[Guest] 承上一篇，講完旅款讀咩之後，就講中史。我相信唔少嘅中史老師喺F3嗰陣可能都會講下高中中史大概讀咩，但小妹都會喺到講吓究竟係讀咩，同埋有咩要求。
首先，就講下要讀咩。有好多人都話中史好多嘢背，的而且確係嘅😂。我讀中四嗰陣就要由周代封建讀到去清朝民族政策，中間要背嘅嘢固然唔少。周代封建、春秋戰國、秦始皇統治措施、漢武帝統治措施、王莽、孝文帝胡漢融和、隋文帝統治措施、唐太宗統治措施、唐玄宗統治措施、安史之亂、宋朝同元朝中央集權、明朝同清朝(康熙同雍正)君主集權、仲有清朝民族政策。中五就讀鴉片戰爭、英法聯軍之役、洋務運動、甲午戰爭、列強劃分勢力範圍、維新運動、八國聯軍之役、辛亥革命、民初政治亂局、第一次國共合作及分裂、日本侵華、第二次國共合作、抗日戰爭、國共分裂、1949中共一堆政治運動、民革、對外開放、對外關係。中六就讀選修單元，我嗰陣就讀制度史(老師揀)，都係死背居多。
其次，喺考試要求方面。中史一定係咁多科選修科裏面寫字速度要求最高嘅一科。我嗰陣讀F4，miss話一條25分題，限時40分鐘要寫至少2版半。一開頭我都覺得好恐怖好難好癲，但慢慢鍛鍊下就慣，而且讀中史嘅人普遍寫字速度有返咁上下，可以幫到自己作文、中文聽綜、通識，以致英文作文都幫到，因為讀中史嘅人寫字速度會更快練成😂。不過，中史dse從來係冇固定MC題，所以要預25分全部都係要寫好多字。如果你好彩嘅話，可能會預到啲配對題，加上而家dse將中史啲分整碎咗，2020dse 25分題中都有啲1分2分題，係啲短答/填充題嚟嘅。
不過，小妹覺得讀呢科都有好處。如果你讀中史，你就算唔明其中一個課題，你後面嘅課題都唔會唔明，因為中史前後兩個topic通常冇咩關連，所以有唔少課題都可以獨立一個咁讀。同數學唔同，數學你可能斷咗課factorization，後面你就可能會唔識用唔明，跟住後面嘅課題都斷哂。
希望以上嘅資訊幫到大家🙏🙏🙏sor for 1999
最後，祝F3嘅同學揀到自己心儀嘅科。仲有一班就嚟考dse嘅同學，加油呀！知道你哋受咗好多壓力，又唔知點溫書，個心又好驚溫唔切。作為喺網上po文嘅小妹都冇咩可以做到，只可以鼓勵下大家。不過，無論發生咩事，都總有解決方法🙏🙏🙏🙏dse不是人生的一切，而且出到嚟見工，僱主都甚少睇你dse考成點(除非考醫生等等嘅狀完科)。所以希望你哋可以諗通啲，就算dse考衰咗，個天都唔會跌落嚟，因為呢個世界仲有唔少人會撐住你！小妹考dse嗰陣都考得唔好，比預期之中差好多，但最後個天都畀咗個適合嘅路我行。因為只要肯撐住就得，所以小妹即使dse考得唔好，而家都覺得讀得幾開心。希望大家唔好有「dse就是人生」，「考得唔好人生就唔洗繼續行」等等嘅呢啲諗法。仲有，最緊要係大家身體健康！！見字飲水同溫書☕️☕️☕️🔥🔥🔥