#NSS個人
[GUEST] **長文，啊唔係虎，總之有閃光彈，慎入啦**
大家好
首先，我想分享下自己嘅故事。上年F3嘅時候，我正式同同班嘅一個女同學成為情侶。一開始都冇乜人知，到之後去到全校老師，甚至連各自嘅屋企人都知道曬，亦都好好彩大家都冇反對。個個本身都好開心，冇乜嘢。
香港政府啲on _政策唔係第一日架啦，而正正因為呢個原因，佢(我女朋友)阿爸就提出之後好有可能會離開香港移民。當然嗰陣未確認真係會走嗰陣冇擺喺個心度啦。
直到冇幾耐之前，確實咗真係會走，移民去澳洲。知道咗呢個消息，正常人都會唔開心啦。
正正就係因為咁，我做咗個而家諗返極度自私而後悔嘅決定……
佢係個非常愛我嘅人，我成日都要佢照顧，冇見一段時間會好掛住我，但就係因為咁，我決定遠離佢，甚至去扮鍾意第二個，令佢討厭我，就係想佢可以喺去英國之前放低我。我知，我真係極度自私，冇企喺佢角度諗，甚至hurt到佢，唔係講笑，佢係個非常情緒化嘅人，嗰陣佢真係用刀界自己隻手。
因為呢件事，引發咗之後好多事嘅發生。雖然我刻意疏離佢，但係我其實仲好愛佢。但係我唔想見到佢喺離開之後更加唔開心。決心疏離佢之後，佢朋友都勸佢離開我，但係佢因為太愛我而冇聽佢哋講。佢咁做，都令之後發生咗啲事**(下文會講)**而我朋友都建議我跟隨自己嘅心，做咗決定就唔好返轉頭。但係，因為佢坐喺我附近，每日望住佢唔開心，我個心就會隱隱作痛，非常內疚，因為咁，我主動搵返佢，同佢解釋，佢都好開心可以繼續同我一齊。
原本以為件事就咁就算，我啲朋友見到我食回頭草，多少都有啲不滿，嗰陣都仲叫冇乜嘢。再之後，我呢個pk竟然重復做多次，再次疏遠，甚至單方面提出分手。嗰陣佢好唔開心，佢啲朋友都再一次勸佢離開我，幾好笑嘅係，佢仍然冇聽。佢啲朋友都放棄勸佢。
再之後，我去咗同社工傾咗一段時間，知道咗自己嘅真正想法，決定咗。冇錯，再次複合，亦都係最後一次。可惜，因為今次，我哋兩邊嘅朋友都放棄咗我哋，唔係講笑，我哋點解釋都冇用，喺班上面，我哋成為咗兩個獨立嘅個體，嗰段時間我勁灰，冇曬班朋友，得返一個對我好好但係就嚟要走嘅女朋友，甚至係聖誕party，都坐埋左係角落頭。
自問我自己，雖然平時係好煩，仲gay gay地(?)，但係對佢哋都叫唔差，佢哋需要我嗰陣都會喺度，佢哋唔開心雖然會串一兩句，但係都會安慰佢哋，可能有時過激，令佢哋更加唔開心，我自己都知衰，但係過咗幾年之後先改一定會俾人話虛偽。佢哋都知我有呢個諗法，佢哋啱啱開始疏遠我嗰陣，都只係唔同我一齊玩，但係到之後，約好咗一齊食飯，但係佢哋就一齊跑走，我追到佢哋，一齊坐低咗，我就俾人當透明咁無視，當然我好唔開心啦，食完飯擺低咗錢就走先，但係我真心，到而家都冇嬲過佢哋。我唔想扮聖人，但係我真係好鍾意呢班朋友，係，我係好黑人憎，又煩，又串，我今次真係決心會改。
啱啱開始畀佢哋疏離嗰段時間，我每日都灰到落谷底，我女朋友每日都喺我身邊陪住我，但係都無補於事，我哋都有試過各自主動搵班朋友，但係就係得唔到原諒。我哋好想知佢哋嘅想法，我用盡曬所有方法，佢哋就係唔肯講。之後我甚至同屋企人因為咁嘈左場大交，仲入廚房攞住把刀威脅佢哋，阿爸一巴打醒咗我。見社工，同班主任傾，直接各自搵佢哋，乜都試過曬。
同樣情況我女朋友都係，佢啲朋友個個都覺得佢重色輕友，所以就一齊疏遠佢。我女朋友係佢好細膽嘅人，直至到last day佢先決定去搵佢哋。
直到而家，我女朋友已經確定咗日期，今個月內就會飛。因為停課，日日都要用zoom仔，同佢見嘅時間大幅減少，佢忙住執屋，根本抽唔到時間出嚟見個面食餐飯。
我好想透過呢篇文章，知道你哋有乜建議，同埋見到呢篇文章嘅朋友們，你哋見到一定會知打呢篇文嘅係邊個，我喺呢度鄭重道歉，希望你哋可以重新接受我。對唔住，我會改過，希望你哋可以原諒我。
****thx admin po ig