我今日交咗人生中第一個朋友 ［可能係長文；慎入。］
–
我今日同一個喺學校經常玩嘅同性男同學傾計，其實我覺得佢好好人，唔似佢講得自己咁衰咁。可能我地兩個都有小小缺乏安全感。不過，佢會輔導我功課、網課瞓遲咗會提醒我上堂、我會同佢傾小說⋯⋯
–
我其實好鍾意佢❤️，我暗戀緊佢。我諗，所有關係應該由做朋友開始。我其實由我出世都依家都無咩朋友，呢次係我人生第一次交朋友，我其實好緊張。我唔知要點做。
–
當時，我嘅喉嚨有一種好緊嘅感覺。我問佢「我哋要唔要做朋友？」
–
空氣靜咗幾秒，我嘅心當時沉咗。我驚佢唔會接受我，或者佢淨係當我係hi-bye friend。不過最後，佢笑著同我講：「好吖 :D」我一齊笑咗。我知咁樣好奇怪；我地依家F4，邊有人咁直接講嘢㗎。
–
就係咁，我喺十五歲有出世以嚟第一次交咗朋友，佢就係我嘅同性暗戀對象。我真係感受到有朋友嘅美好。我希望今次可以同佢拉近關係，我想以後同佢一齊，做佢嘅男朋友❤️。可能呢個願望唔會實現，可能其他人唔會接受我係gay嘅事實，但我會珍惜當下，我知足。可能，我當咗佢係我人生中嘅第一絲光明。
–
我知，其他人唔會好似我咁直接，用「要唔要做朋友？」咁奇怪嘅方式同人相處，但呢個係我第一次。可能我怕醜，我可能社交能力唔好，我小學、幼稚園都無交過任何朋友，一直以黎都係自己一個。就算有，我都唔知佢地係咪真係我嘅朋友。我都知，佢就算話「好」，可能都唔係當我係佢真真正正嘅朋友。
–
但係，無論如何，我好感激我今日嘅新朋友。