#NSS家庭
[GUEST] 我好驚我阿爸阿媽離婚，佢哋成日鬧交，有時過一段時間又好返，但其實問題一直都冇解決過。
前排我阿媽問我阿爸有冇幫我阿哥做某樣嘢，然後我阿爸就開始唔耐煩，因為阿媽已經連續問咗幾日，我阿爸就有啲激動咁同佢講嘢，之後就開始同我阿媽鬧交鬧得好犀利，我喺自己間房入面根本唔敢出聲，因為之前有一次阿爸太嬲，就叫埋我出嚟鬧，同埋問我阿媽講嘅嘢啱唔啱（好惡咁問）。
前幾日準備過年嘅時候佢地又開始鬧交，阿媽質問阿爸錢嘅問題，然後又開始懷疑我阿爸係咪有第二個女人，之後我阿爸就好嬲，佢講咗好多次佢冇但阿媽唔信，對住阿媽講嘢基本都係大嗌嘅，我阿媽就好執著，一直懷疑阿爸，又喊住咁同阿爸翻舊帳，有時阿爸會嬲到直接出去，過一陣先返屋企。
我阿爸阿媽都上咗年紀，我唔想佢地成日咁樣，都結咗婚二十幾年老夫老妻喇。其實我阿媽呢二十幾年都受咗好多苦，阿媽成日同我地講啱啱生我阿哥嘅時候佢窮到車錢都冇，我阿哥就一直跟住佢捱，真係好慘好慘咁，然後又話阿爸屋企人因為阿媽係大陸嚟嘅所以一直睇唔起佢，有時會講到喊，我又唔係好識安慰人，就坐喺度唔知點算好咁。
阿媽講過，如果唔係有我阿哥同我呢個仲係中一嘅阿妹喺度個話佢早就會走，仲話當我18歲嘅時候佢就會即刻走，我唔知佢係真係諗住走定賭氣，搞到我一直提心吊膽咁。
佢地鬧交呢個情況已經有幾年，喺我差唔多小四就已經出現。佢地次次都咁啱係喺我阿哥唔喺度嘅時候鬧交，我細個嘅時候太驚會忍唔住喊，宜家我就會一直忍住，直到夜晚瞓覺諗返之後先偷偷地喊，有時仲會喊到瞓着。其實佢地要嘈個話我冇所謂，我唔想再次次都夾喺佢地中間聽佢地鬧交，唔想再做佢地發洩情緒嘅工具，唔想再介入佢地啲問題，如果一直要咁個話，我寧願佢地當初唔好生我。
(sor for 1999)