#NSS家庭
[不希望透露] 投稿可能1999請見諒///下文為咗唔好比人認出嚟，視乎實際情況適度更改。
我覺得同老豆相處好辛苦。小妹而家form 3，喺一間唔錯嘅中學就讀，成績大概中間值左右，係個完完全全嘅文科人。一切大概喺中3第一次測驗嗰陣發生，我所有科得數學唔合格，冇諗過之後會變成咁…
老豆知道咗之後好嬲，然後又開始話我英文成績都唔好，成日係咁鬧我，話我同小學嗰陣唔同。但其實中學同小學差好遠，我都覺得有努力過，所以都冇點擺喺心上面。結果佢超級care呢件事，由嗰陣到而家半年，從來冇一日係唔講關於我嘅成績，係咁話我唔努力讀書，又係咁話我與其打機不如去背多幾隻字好過，去做多幾條數。我日日都好唔開心，我唔鐘意比人咁樣講，雖然無可否認我數學係好差，但我真係有努力去理解同學習：我有唔明嘅問題一定會問數學好嘅朋友，會嘗試去搞明白，但就算係咁我有陣時都係無論點都唔明。
到咗第一次考試，我比上次花更多心力落數學度，總算係合格，喺文科都有唔錯嘅成績。但係老豆佢都係唔滿意，仍然係日日鬧我數學唔掂唔好，又寸我（sor我唔知道正字係邊隻字）。我都覺得好大壓力。
令我最大壓力嘅係：佢超討厭我嘅興趣。我嘅興趣係整手工，一開始嗰幾次佢見到都冇野，然後就係第一次測驗之後，佢叫我少玩啲手工，佢覺得係手工拖累咗我嘅進度。後來當我整緊手工嗰陣，佢會直接盯住我，我覺得超唔舒服，好大壓力亦好驚。自此我冇再喺佢面前整過，凈係得佢出門嗰陣我先會整，但成日都覺得佢就翻黎，玩得唔安樂。有好幾次比佢發現我偷玩手工，佢都好嬲，話我浪費時間，話咩「你又喺度整埋啲咁嘅野」。到目前為止都有幾次話要丟曬我所有手工嘅野，有種威脅我嘅感覺。我超級唔鐘意感覺，我唔想我以後興趣會變成我驚嘅野，如果連手工都唔可以令我開心，咁我對生活嘅熱情真係冇咩剩，會得翻手機同朋友。
然後導火線係呢兩日嘅事。
尋日：佢翻到屋企，我因為執緊野所以遲咗少少幫佢開門。佢話如果我下次喺度沖涼之類唔方便嘅話可以唔使開門，佢可以自己拎鎖匙開，我話OK。
之後佢問我最近有冇同阿哥聯絡，我話我之前問咗佢一條數學題，佢超級嬲，因為阿哥嘅成績唔好（但其實阿哥嘅數學係少數地比較好嘅一科，有唔錯嘅成績），而我居然要問阿哥問題，老豆話我成績居然已經差到咁，又用鄙視嘅眼神望住我。我差啲當場喊出嚟，一方面係我唔想佢咁樣貶低阿哥，一方面係我自己都覺得佢講得好過分好hurt。
然後到今日：我平時我係下晝沖涼嘅，但係今日下晝有野做所以我唔記得咗沖涼，記得嗰陣已經係佢差唔多返到屋企嘅時間，我就急急忙去沖涼。沖涼嗰陣佢翻咗屋企，我同佢講我喺廁所沖緊涼所以冇應門，佢開始抱怨我做乜喺呢個時候沖涼。我出嚟之後，佢叫我以後如果嗰個時段沖涼要同佢講先，我心諗wtf但冇講啲咩。
佢今日帶外賣翻黎，我嗰陣啱啱沖完涼覺得好攰，所以就慢慢打開外賣盒，之後佢勁嬲，問我做乜死死氣咁，又發我脾氣，我根本冇機會解釋，不過我覺得就算解釋佢都會責怪我。
由於佢呢幾件事，我完全冇胃口，個飯盒完全食唔完，我唔想浪費食物所以好慢咁食，但其實我已經好想嘔，而且我好清楚如果剩飯會比老豆鬧到七彩，到頭來都係要食埋，所以一直安靜咁食。食飯嗰陣佢又突然話以後電腦打機要問過佢，但其實我電腦打機已經少過朋友好多，我其實好嬲好難過，但都忍住。
然後過咗一段時間，佢開始鬧我食野食成一個鐘（實際時間應該冇咁耐），又發現我今日玩手工嘅痕跡（我都有收拾，但係有陣時會跌啲配件喺地下），佢直接同我講以後唔要再見到我玩手工，叫我掉咗我啲手工野，我真係忍唔住，我覺得好委屈，直接喊咗。我好耐冇喺佢面前喊，因為佢話過「你憑咩喊」「你有咩資格喊」，但今次真係忍唔住，我覺得好大壓力，頂唔順了。
雖然係咁但我都係食完嗰個飯盒，雖然裏面有好多我嘅眼淚。然後我又翻房喊到傻咗咁。
佢完全冇理我，過咗一兩個鐘之後又同我講以後如果我成績退步，可能手機嗰啲都要收，冇得打機/同朋友傾計。
我唔知我表達得清唔清楚🥲🙏但我真係覺得同佢相處好攰，好無力。我有好多次想要離家出走，但又實在冇咁嘅勇氣。有諗過自殘，但我真係又好怕痛。我想象過好多次我同佢鬧交之後喺佢面前跳樓，但我唔會自殺，我唔捨得好多野。我想佢哪怕係少少都好，體諒下我其實都只係普通人，我係個平均值嘅人。
題外話就係其實我有難以入眠同磨牙嘅壞習慣，通常我壓力大嗰陣會仲加劇。佢知道呢件事，但次次都凈係同我講叫我提自己放鬆，亦都冇諗過佢其實都造成好大壓力比我，但係我唔敢同佢講呢件事，我驚佢發嬲。
我都唔敢同朋友講，唔想比佢地擔心之類。希望有具體意見，我可以點樣改善我同老豆嘅關係或者點樣可以互相理解🙏我明白佢返工好辛苦，但我都無形中有好大壓力。
感謝admin出po！麻煩了！！