#NSS家庭
[GUEST] 我成日都會係到諗點解要係我
點解要係我面對呢一切
我今年F6但係幼稚園甚至係小學時候嘅事
到而家對我嘅影響仲好深
印象中我嘅童年回憶都係同貧窮有關
細個住過劏房，小學時候爸爸爛賭差人大耳窿
淋紅油、電話騷擾、貼大頭相、去婆婆屋企瞓覺、父母離婚……..
基本上我嘅童年生活就
好似香港電視入面嗰啲家庭倫理劇咁
小學嗰陣我以為自己嘅家庭好正常但其實唔係
後來爸爸同媽媽因為返咗教會信基督
爸爸決心戒賭戒煙又同媽咪結返婚
當我升中學嘅時候已經再冇俾人追數嘅經歷
所有事都向好嘅方向邁進緊
明明我應該覺得滿足但係我淨係覺得好唔公平
點解要係我面對呢啲？
點解其他人係洗衣粉廣告入面嘻嘻哈哈嘅家庭
而我就係政府戒賭宣傳廣告入邊嘅家庭？
點解屋企人可以走出黎但我唔得？
我一直扮演緊一個乖乖女
因為我知道屋企唔可以再出現其他問題
但我好攰，我好似好乖一直冇闖禍努力讀書
但我真係好攰，我甚至唔知自己點解要咁乖
我唔會係屋企入面嘅first priority
屋企入面永遠都會有其他更加緊要嘅嘢發生
所以我要做好自己，我好少表達我嘅情緒
因為我唔可以再增加麻煩令屋企人擔心
但係小學嗰陣因為貧窮嘅傷心我都而家都仲記得
我仲會因為小學嘅事而喊但我知我唔應該咁樣
–
細個我最期待嘅事就係返學
因為屋企比我嘅印象一係就好安靜一係就好嘈
返小學令我覺得自己同其他人係一樣但我唔係
我好羨慕人哋可以買自己想食嘅零食、儲prism stone玩機台、去日本韓國旅行、行西九格仔…….
即使我而家有能力可以做到以上嘅事
但係已經冇咗意義….
我以為我而家有錢做返細個想做嘅事會變得開心
但係事實上我淨係覺得好空虛
而家先做返已經無當初嘅嗰種感覺
細個肚餓過到依家食飽返
都係緩解唔到嗰陣時肚餓嘅痛
細個肚餓嘅嗰種空虛感去到
而家深夜仲喺度折磨緊我
我可以點先釋懷到？
我好似由細到大都一直喺度拒絕緊負面情緒
我唔知幾時先係我可以發洩情緒嘅best timing
我覺得我表達傷心呢件事就會為身邊人帶來困擾
所以到中學我先會因為細個嘅事而唔開心
聽落去好似好傻好戇居咁但我真係好辛苦
原來「唔開心」呢種情緒係唔會伴隨着時間而消失
佢一直喺心入邊某個角落慢慢發芽、長大…..
–
最後多謝你睇到呢度
我打到中途都有啲亂希望大家睇得明:)
同埋奉勸大家冇能力嘅真係唔好生小朋友
原生家庭對小朋友嘅影響真係好大
我到而家都唔明點解我要出世
好似我為屋企人帶來嘅只係負擔同埋不幸