#NSS家庭
[Guest] 有冇人可以教下我，面對家暴有咩方法救到我。。。
長文慎入！！！🙇🏻♂️🙇🏻♂️
講返我嘅經歷先
我有一個家姐同細佬，我哋都係自細俾人打到大。我印象中我第一次俾個垃圾老豆打係第一日返完幼稚園之後。係我升上中學之前，帶傷返學係一件好常見嘅事。
我媽都係，俾佢打左好長一段時間，自我記事以來就係咁。細個就成日見住我媽俾周圍dum，dum落地下，dum上衣櫃到。(我唔太識應該點形容，總之係聽到把聲都會覺得痛嗰種)
好多次都係我媽拎把刀隊住自己，攞自殺威脅佢，佢先肯停手。
但好彩，隨住我哋開始大個，又或者話佢冇左份工，佢因為有所忌憚或知自己而家係做米蟲，至停咗手一段時間。但我知只係暫時嘅事，佢只係有所收斂。喺之後嘅時間，佢依然間唔鍾會以武力嚟威脅我哋聽佢話，有時仲會郁手，只係相比起細細個遭受嘅，要輕得多。（可能因為俾人打得多，層皮厚左，自然冇咁痛。）
如果之後一直都係咁，我諗都算啦，都咁多年，我哋都大個哂，最多我哋帶住媽咪搬出去住就係。對於就快讀完書嘅我哋嚟講，都係忍多幾年嘅事，咁多年都已經捱左過去。
今日，因為啲小事，佢再次郁左手打我，我有反抗，件事係我媽嘅制止下停左手，而亦都好好彩哋，我冇受傷。
可能唔慣一直壓制住嘅嘢突然反抗，佢揚言再激嬲佢，佢就攞刀斬死我哋。
我哋住喺同一屋簷下，你要話冇啲碰撞，真係冇可能。我唔敢賭，唔敢保證佢唔會咁做，但我真係諗唔到有咩方法可以制止佢。（個垃圾以前係做地盤，我又比較瘦弱，我真係唔覺得我有機會可以撳得住佢。）
我好憎佢。喺我小二嗰陣諗過趁佢瞓覺攞刀殺左佢，但我唔敢，直到我而家18歲都唔敢。我驚我殺唔死佢，我驚死，我驚坐監，佢嘅陰影已經籠罩我18年，我唔想再因為佢，搞到我嘅人生玩完。
我哋頭上依家就好似懸掛住一把刀，我哋唔知佢幾時會再郁手，唔知佢會唔會真係斬人。
我有睇過下Google過關於家暴嘅嘢，但睇完之後，我心入面只剩低絕望。
法律根本保障唔到被家暴嘅人，咁講可能有啲荒謬，但要等家暴發生左之後先可以判刑，仲要判咁輕，只有謀殺先可以判終身，講真到件事發生嘅時候就太遲。
見到啲案例，啲人都淨識一味調停/調解，同推你返地獄冇分別。
(對唔住，我可能啲嘢講得好荒謬好on9，我自認諗唔到更好嘅解決方法。但我相信每一個受家暴影響嘅人都唔係要調解，即使係強制令都冇辦法抹去心中嘅憂慮。)
唉。。與其話我係嚟搵方法，倒不如話係上嚟訴苦，而家嘅心只有不安同絕望。
Sor for 1999 有講得唔好嘅地方請見諒🙇🏻♂️