#NSS其他
[一個喺惡劣環境嘅補習社下補習過嘅學生] 我想問大家講下我小學嗰陣時嘅補習社。個名叫晴朗星級教育中心。係喺屯門某間商場。補習社嘅老闆係個大媽，因為佢冇咩學問，所以佢只會同小學生補習，中學生就俾佢請返嚟嘅Miss阿Sir（太多數係大學生）。
大媽仲會叫啲學生做嘢，佢叫嗰啲人大多數係小學六年級，喺補習社補咗幾年習，冇爸爸媽媽接送補習。佢會叫學生做啲咩？例如帶小學生去廁所、幫佢買嘢食、幫學生開門（出面入嚟嘅人要入面嘅人撳個掣先入到嚟，即係道門要撳個掣先開到）幫佢影印練習、幫佢塗試卷⋯⋯佢有時會俾10幾蚊俾做得好嗰啲學生買嘢食，即係揞口費。
講起塗試卷，大家知唔知啲試卷係點得嚟，就係學生嘅考試試卷。通常考完試派試卷，大媽就會叫我哋俾試卷俾佢睇，多數一俾佢就攞唔番嚟，通常我哋會喺度催佢快啲俾返我哋，但之後我哋都會冇咗呢回事，之後我哋嘅試卷就會變成其他學生嘅Past paper。
因為大媽無上限地收學生，搞到班補習社迫爆，好多學生都冇位坐，甚至會叫啲人企喺度做功課，叫啲人提早放學，讓啲位俾啱啱新嚟補習社嘅學生坐。迫於無奈，佢終於租咗同層嘅一個舖位（好細），所以入面得一位miss阿Sir。
我就同大家講吓一件喺新嗰間補習社發生嘅事。事緣係一位小學一年級嘅學生要去廁所，個Miss就要我帶佢去廁所，我唔想帶佢去，佢就威脅我要我帶佢去廁所，唔係嘅話就唔對我啲功課。嗰陣時因為我只得小學六年級，所以我只好帶佢去廁所，我根本講唔過一個大學生。
同埋佢收學費唔會寫收據，每個人嘅學費都唔一樣，就算係同年級同時數都係唔一樣。有一次我明明俾咗學費俾佢，但佢硬係話我冇俾學費佢，最終要我媽媽接我放學同佢講咗好耐先話我俾咗學費俾佢。
大媽會成日＂關心＂我哋，當然係問吓我哋有冇聽到學校老師知道補習社嘅真面目。有次，有間小學訓導主任嚟巡商場睇吓佢嘅學生（因為佢知好多學生都喺依個商場度補習），之後個訓導主任就同大媽講想入嚟睇吓佢嘅學生。大媽梗係唔批准，話會影響學生補習。十成十就係心虛，驚俾訓導主任睇到補習社嘅環境同埋迫爆嘅場面。大媽入返嚟補習社之後就話個訓導主任有問題，之後大媽仲逐個逐個質問嗰間學校嘅學生，仲叫佢哋以後收到嘅風都要同佢講。
我之前仲見過佢抄試卷嗰陣時摷到支陳年冰條，佢轉手就送咗比坐佢隔離嘅學生⋯⋯佢走咗去鬧學生嗰陣時我就偷偷地睇吓幾時到期，睇到嗰陣時都嚇咗嚇，竟然兩年前就過咗期。
大媽仲會差別對待學生。通常啱啱入嚟補習社補習就會坐佢嗰枱，悉心咁同佢講解。淨係補專科嘅人就會享有彩色影印，幾乎一對一咁同佢補習，仲會請嘢食俾佢哋食。
講住咁多先，已經諗唔到嗰陣時發生過咩事，如果大家想知，我盡量回想返同大家講，如果你哋都係喺嗰間補習社補過習嘅，不妨都分享吓嗰間補習社嘅黑料。同埋大家知道親友都喺嗰間補習社補習就叫佢哋唔好再補，再補落去就會能為工人。（如果你知道我係邊個，唔好爆我名pls)
sor for 1999