#NSS家庭
[Guest] 純粹想數下苦，講吓背景先，屋企有兩老(都係藍嘅)，阿爸就係所謂嘅中立，好好彩阿媽係黃。
最近佢哋講政治嘅情況又嚴重咗，可能到而家有人都係覺得唔講就可以，但係情況梗係唔會咁簡單。就係因為琴日(4/3)嘅47名民主派需要繼續還柙，又講埋啲好難聽嘅說話，例如 「要開香檳慶祝」/「現眼報」等等。
呢個情況一直維持咗好耐，但係最近佢哋差唔多日日都係講埋呢啲嘢，仲要講到勁大聲，驚死人哋唔知。佢哋真係好唔識做，好似誰大誰惡誰正確，日日都喺度挑撥離間，挑釁我，撩交嗌，而每次都係我忍、我讓步。只可以講，忍一時激親自己，退一步益埋人哋。我已經盡量唔理佢哋，但係咁樣又會比佢哋鬧我唔應佢，不孝。一直我都好想互相尊重，比下面佢，咁咪一齊唔講。如果真係可以嘅，我依家就唔會喺度打呢篇文。日日都喺呢個環境下面讀書，真係好辛苦又好大壓力。
幸運嘅係，阿爸都好識做，而家已經盡量唔講，所以都算唔錯。但係阿媽琴日好depressed，每次發生呢啲事件嘅時候佢都會同我講想快啲走，但係奈何地，屋企冇咁樣嘅經濟能力，阿爸都好似唔係好想走。雖然阿媽而家學緊投資，都好努力搵錢/儲錢
，當然係呢個情況下，係冇可能租屋住，但係我覺得要繼續留喺呢一個所謂嘅「屋企」，我都覺得留多1秒鐘我都就嚟窒息。
雖然我唔知呢一個情況要維持幾耐，但係有得揀我一定唔會想走，唯有希望呢啲咁嘅日子可以快啲過。多謝大家睇到呢度。