#NSS家庭
[GUEST] Admin可以po ig嗎？唔該🙏🏻。
Hi，我投稿唔係想求咩意見，其實我有嘢想講，但唔知同邊個傾，所以喺度傾訴啦，我真係好唔開心。
你哋會唔會成日好自卑，我係咁，我自卑到連行路都駝背，我阿爸成日叫我企直。
小學嗰陣考第一，阿媽話「吓，你咁都考到第一」。細佬讀同一間小學，有次第四，阿媽就話佢好叻，跟住我就好唔開心。我鍾意畫畫，由細攞過唔少獎(但我有睇人地嘅畫，當然知道我比好多同齡人畫得差)。我攞獎我阿媽淨係話「又多張廢紙」，即係張證書。我細佬都有畫畫，冇我咁鍾意，亦少啲攞獎，阿媽成日都讚佢畫畫靚。仲有好多嘢，不過我唔想寫啦。
阿媽同我講嘢，經常都係講關於細佬。電視見張家朗攞金牌，就話細佬都去做運動員參加奧運啦。有時又話，細佬第日會做到好勁嘅科學家或者醫生。
中學暑期功課你哋都知係以「堆」計㗎啦，小學就一本。細佬頭一個星期就做完，我阿媽就話我懶。我話我朋友直情話佢哋未做過，阿媽就話睇下你細佬。
細佬食超多嘢，但係食極都唔肥，瘦到我覺得佢太瘦，排骨咁。我都唔算肥，至少我bmi18親戚都話我瘦，但我阿爸唔知係咪攞細佬做標準，話我肥。佢仲話細佬腳長，我腳短。
我好唔開心。我好似，永遠得唔到嘉許。我攞獎，但嗰啲係廢紙。我小學考第一，但嗰啲係符碌。我讀band1a嘅中學，但淨係考到中間。我都唔知我做緊啲乜，我搞下搞下唔知幾時開始非常自卑，一開口都係負能量。有時我突然覺得自己好廢，就會匿埋唔知喊乜成嚿垃圾咁。我好想我父母都可以讚下我，sorry…係咪好幼稚？我覺得好攰呀。😭
有打錯字大家勿怪，sorry for 1999