#NSS個人
[GUEST] 是咁的，小弟14歲讀中三，已經學咗音樂超過10年。我好鍾意音樂，亦都曾經攞過唔少獎項，連而家入到呢間名校都係靠拉琴入去嘅。
仲記得小學嘅時候因為學業冇咁繁忙，同埋我都好輕鬆應付到測驗考試，基本上一有時間我就會攞個琴出嚟練。曾經我可以每一日練四五個鐘頭，但係上到中學之後就完全唔同。
上到嚟中學，學業繁忙，加上學校orchestra chur 死你。啲同學黐線咁讀書，我開始覺得讀書好吃力，成績一躍而下。於是，我開始逐漸減少拉琴嘅時間，cut到每日半個鐘，之後因為中三揀科要讀書，一個禮拜都唔知練唔練到一次。但係我好肯定自己仲好鍾意古典音樂，因為自己平時壓力大、或者溫書嘅時候都會聽返古典音樂舒緩心情。
最近，因為某啲原因帶出咗我同我老豆傾吓仲學唔學落去。佢認為反正我遲啲大個都唔會從事音樂有關職業，繼續學嚟做咩呢？一個禮拜都剩返咁少時間拉琴，與其為咗上堂吊住條命，不如停咗佢，專心讀書好過啦。反正繼續行落去都係三年時間，18歲就一定要停。其實我都同意佢講嘅說話，即使我幾鍾意音樂都好，我希望將來從事金融工作，所以諗咗一兩日到就決定停咗10年嘅學琴生涯，亦都告知咗一直陪住我10年幾嘅學琴老師。
一開始我諗停咗都冇所謂啦，我第時又唔係諗住做音樂家。但我從來冇諗過停咗之後會令到我咁唔開心。呢一個禮拜我完全無辦法聽大提琴嘅古典音樂，我會諗起自己已經冇可能再學到呢首歌。更甚嘅係，我覺得好對唔住我拉琴老師。
佢係一個嚴厲之中帶點溫柔嘅老師。雖然佢係我小學階段嘅時候好惡，但試問如果冇佢，我又點可以係咁多比賽邊攞咁多獎呢？我又點樣可以考到入嚟呢間咁好嘅學校呢？
最後一堂，我冇辦法直視佢，我覺得好羞愧。我好後悔呢個決定。完咗之後，我先驚覺自己嚟緊都唔會再見到前10年每個禮拜見嘅老師（佢係一個公私分明嘅人，唔會同學生有任何學琴以外嘅關係）。我真係好唔捨得佢。雖然我知道人生離離合合乃係正常之事，但發生係自己身上真係唔係咁易消化到。
落堂後，我end咗個FaceTime，望住部琴，突然間覺得既熟悉又陌生。我好似好耐好耐冇再自己喺屋企認真拉琴。近兩三年嚟，我都係為咗應付學校樂團同埋學琴嘅老師先至敷衍去練一陣琴。我攞起部琴，拉我最鍾意嘅Haydn Cello Concerto 2（唔知唔緊要），我發覺我嘅生命唔可以冇咗音樂，我真係好L鍾意拉琴。我突然明白到拉琴唔係為咗第時嘅職業，係為咗對音樂嘅喜愛同熱誠。試問有幾多人學完琴之後真係會做音樂家？
經過呢件事之後，我想寄予大家人生要活在當下。可能你而家十幾歲仲讀緊書，你可以盡情放肆咁玩你嘅音樂，做你最鍾意嘅運動。千祈唔好比讀書壓力令到你失去呢個機會，因為冇咗就唔會返到嚟。到你踏出社會、打工、結婚、生仔，人生嘅包袱越嚟越大，到時唔會再有時間、金錢同埋心機俾你再去追番追唔到嘅夢想。而我，雖然冇辦法再學琴，但係用前10年從我最敬愛嘅老師身上學到嘅知識，我仍然會保持住初衷，喺空閒時間自己學習自己鍾意嘅曲目。但唯一不變嘅係，我一生都會好L鍾意classical music。
第一次投稿，sor for 1999