想講吓政治問題2.0
上次我見到大家嘅留言，不過我真係唔夠膽做呢啲嘢囉… 今次又借nss 抒發一下啦。咁我都講過我阿婆以前係小學中文老師，所以佢就同我溫中史。溫到秦朝嗰度，佢又講嗰啲嘢啦🙄。
首先秦始皇做嘅所有統一制度缺點都係人民反感，然後我阿婆就話：「人民反感反下反下就唔反感㗎啦，即係好似普通話一開始啲香港人都好鬼反感㗎啦，依家有冇呀？」其實我想講而家仲有好多人反感㗎，但係又唔夠膽所以被逼附和佢。我知如果我唔講嘅話佢又會話啲後生㗎啦。
然後就講到秦始皇嗰個時代香港呢個地方已經成為中國版圖嘅一部份，然後我阿婆又話：「係囉都唔明點解啲人成日都話香港獨立，香港明明就係中國嘅，blah blah blah。」我想講何謂港獨？你有冇fact check 過？然後我嗰陣好大膽咁講「都冇人話港獨」然後佢又話啲後生啦…
到咗統一文字嗰度，佢就話全世界啲人學中文都係學殘體字，淨係香港同台灣先用繁體字咋嘛，成個中國都係殘體字。又話普通話都唔知我哋反感啲乜，廣東話同埋繁體字只係方便我哋平時溝通咋嘛，點解要散晒呢。我心諗：如果你真係咁幫大陸嘅話咁你咪移民去北京囉，你係咪香港人嚟㗎，都唔幫自己啲文化講嘢嘅。係喎你之前係打仗喺大陸落嚟㗎喎。同埋啊，統一文字方便人民接受政令，我哋唔使接受大陸嘅政令啊，而家一國兩制！
你地覺得秦始皇係明君定係暴君？好明顯係暴君啦，我阿婆就話對嗰陣啲人就唔好姐，對我哋中國文化blah blah blah blah blah。佢又話唔使洗我腦，但係佢又不停喺度講秦始皇啲優點喎。其實你唔使再讚佢啦，因為你根本就讚緊習始皇！
佢講講吓我已經留咗幾滴眼淚，佢問我咩事，我話我太眼瞓姐。