#NSS個人
[GUEST] 小妹今年F3。最近有個煩惱，唔知點算，想聽下大家嘅意見。篇文有啲長，唔好意思。
我有一個關係都幾好嘅朋友。佢係一個同我同班嘅女仔。我地翻學放學，係學校裡面都會一齊。基本上除咗同我講野之外，佢好少同其他同學傾計。有時我地放學翻咗屋企之後仲會傾好耐電話添！而且佢睇落成日都好開心，好樂觀。(例如：有一次佢好努力溫書，即使最後考得好差都唔會有任何唔開心嘅表情。)作為佢個frd，雖然有小小擔心，但都無太在意，因為有諗過可能佢真係完全唔care 嗰科嘅成績，同埋我覺得如果去問佢「點解你唔會唔開心嘅？」好似有小小奇怪。
但係最近，有一次同佢一齊去廁所洗手嘅時候我發現佢隻左手嘅前臂有好多條痕。好明顯係傷痕嚟，有深色有淺色。(=有新嘅傷口同舊嘅傷口)。我好驚佢有自殘傾向。但係我未見過自殘嘅傷口，所以唔敢肯定。嗰時佢好似發現咗我一直望住佢隻手，所以拉咗件冷衫個袖落嚟。
嗰日翻到屋企，我去Google 開無痕搵咗啲同自殘有關嘅野。其他人嘅傷口同佢嗰個真係好似。然後我又大概了解咗點解人會自殘，又嘗試學咗要點先可以係佢地有需要嘅時候幫助佢地(例如有咩講得，有咩唔講得)。其中一樣係，我無權去詢問，評論自殘者嘅傷口。我都好同意，因為我相信佢應該唔想比人知，亦都唔想無端端提起呢件事。但係如果佢真係一直都唔同我講嘅話我應該點做先幫到佢。我好驚如果我主動問佢嘅話會令佢覺得唔舒服。
之後過咗幾日無論幾熱都好佢都一直著住件冷衫，直到上PE堂嗰日。我諗應該係因為實在太熱所以佢除咗件冷衫。但係佢左手嘅前臂同膞頭下面小小嗰個位都有膠布，我真係好擔心佢。我唔知佢身體上仲有邊啲地方有傷口。我有嘗試搵機會問下佢最近有無發生啲咩唔開心嘅事，定係翻學壓力好大。但係佢無時無刻都表現得好開心，成日笑，我完全搵唔到機會去問佢。我有諗過要唔要同社工或者學校老師講。但係根據我自己嘅經歷，同社工講完嘅野第二日就會唔知點解傳到周圍都係。同老師講嘅話最後都係會連翻去社工度。我好驚我講咗嘅話到時佢仲大壓力，同埋會覺得我背叛咗佢。所以我唔夠膽講。但係我暫時又真係無能力處理到呢件事😭。
宜家諗翻，其實佢平時同我傾計嘅內容多數都係同學校或者我有關，佢好少講自己啲野。佢亦都有講過自己除咗signal 之外無用其他社交媒體，所以唔存在「係IG post 私人野，有關自己近況/情緒」呢件事。
佢經歷過嘅野，佢遇到嘅困難，佢嘅感受，我一樣都唔知。有一刻我甚至係度諗到底我同佢係咩關係，點解我對佢嘅了解得咁少。
但係無論點都好，我真係好想幫佢，但係又唔想傷害到佢嘅感受/我地嘅感情。請問大家可唔可以比少少意見我？或者話比我聽我係唔係有邊一步做錯咗。
多謝你睇完佢，Sorry for 1999.