#NSS個人
[guest] 小妹我由細到大都成日自己一個係屋企，父母成日都要返工，媽咪朝早出去夜晚好夜返嚟，爸爸就開夜更。
二年級屋企請咗工人姐姐，去到四年級姐姐就冇繼續做。然後我就成日自己係屋企，做完功課一直睇電視，就算播新聞我都唔會熄電視，開曬屋企燈，我只有咁樣先可以令到自己冇咁驚。
上年我地成家移民咗嚟英國，屋企都會大過香港個間好多，我父母依家就係下午返工，夜晚11點先到屋企。同埋可能有人唔知，英國嘅水電煤真係貴到飛起，係香港嘅8倍。所以我根本唔敢浪費電開曬啲燈，所以日日喺房度睇電話，出房去個廁所都要提心吊膽。加上呢度唔係香港，冇高樓冇汽車，屋企附近都好安靜，變咗日日都好壓抑。又唔敢同父母講，因為佢哋返下午班都係為咗可以接送我返學，同埋工作難搵，所以唔想打亂佢地安排。
真係唔知點做可以令到自己唔驚，英國嘅時差同香港差8小時，我夜晚自己係屋企嘅時候朋友啱啱好瞓曬覺。