#NSS學業
[polyu] 嗱，講真我就唔係一個中學生嚟嘅，我唔知呢篇嘢會唔會因為唔合資格出唔到啦～ 不過就算真係出到你哋都應該考到一半。
勸世： 揀真心有用同埋handle到嘅科， 讀呢啲唔代表放棄夢想，隨時相輔相成
so本人就當年19分入咗polyu嘅xx工程啦，你話有愛咩？梗係冇愛喇，我唔係低分點會入啫。 本身個人就真係好鍾意一啲歷史文化同埋藝術嗰方面嘅嘢，不過到最後都係揀咗理大工程， 冇呀，其實讀咩科都係咁㗎喇，不過呢科好似方便搵工。
（ 具體有冇用視乎個人立場，我戴定頭盔先）
但你問我後唔後悔？少少，呢科同我當初嘅設想相差好遠，但我發現我學返嚟嘅嘢係真心有用，而且慢慢都發現幾有趣。
雖然大家都知讀呢科未必做呢行， 但始終在有限嘅選擇之下，務實嘅科目對於未來嘅發展比較好就好似中三揀科多為phy chem bio咁樣。
當然啦如果真係文人唔好揀，工程見過頗多純粹因為低分入咗，結果完全適應唔到，啲功課根本唔識做嘅人。
咁可能你會覺得我放棄咗自己嘅夢想，去讀一個本身唔太鍾意嘅科目然後強迫自己愛上咁？ 講真，啱一半。 至少後面嗰部分都頗為正確， 但係撇除主業係個學生， 我有不斷做一啲同歷史文化藝術相關嘅工作， 私底下不斷去學習唔同嘅古法技藝包括但不限於景泰藍、纏花、草編， 目前都有進行小班教學， 又或者同一啲福利組織合作去教一啲老人家去做非遺編織， 同時會同啲學生介紹返背後嘅文化。 目前就學緊專業化妝啦，希望有朝一日可以獨立完成一啲復原造型。 同時得閒都會睇下歷史文獻，車下衫咁樣， 我心知呢啲絕對唔會係我未來嘅正職，所以我可以肆無忌憚咁樣創作， 唔使受啲西客嘅氣， 雖然時間一定會少啲， 至少我覺得咁樣算冇完全放棄自己想做嘅嘢。
咁你哋可能會疑惑相輔相成啲咩呀？ 我發現一個人佢識嘅嘢跨度越大，可以創作嘅諗法都會越嚟越多， 有冇諗過婚紗上面嘅蝴蝶可以飛， 甚至係跟住一啲音樂節奏上下起跳？ 有冇諗過將一啲不切實際嘅諗法通過 drawing變成現實， 甚至成為一種自創嘅縫紉物料？ 至少我唔讀呢科我唔會諗到， 讀咗呢科之後我唔單止諗到，我甚至有可能做到。對我嚟講呢一個科目開拓咗我超多眼界，我見識咗好多平時唔會見到嘅嘢，呢個算係跳出舒適圈嘅另一種成果。
想做自己鍾意嘅嘢在所難免， 無論你作出咩選擇到最後負責嘅都只係自己， 究竟呢個係長伴一生嘅熱愛，定只係一時嘅衝動？要由你自己決定。