我係2021 DSE考生，屋企有個好難頂嘅阿哥。佢份人極度自我中心，覺得自己做咩都啱晒，一定係我同其他屋企人錯。
佢讀中學嗰陣就成日叫我幫佢做功課，未讀完中學就出咗嚟做地盤，但成日唔返工，怨父母生得佢唔夠聰明先要做勞動嘢，有咩唔開心就攞我哋發洩。我就快考DSE，放咗學就會喺屋企溫書。佢成日行埋嚟阻住我溫書，話我讀到大學又點，大學畢業得萬幾蚊一個月，佢做地盤仲多錢喎……
有次佢訓到下午一點先醒，我同阿媽喺客廳嗰度傾緊食咩，佢突然行出房係咁講粗口鬧我地，話「你哋晨早流流做咩講嘢咁大聲」，「做咩嘈住佢瞓覺」，「其他人唔使瞓咩」，咁阿媽比佢鬧咗半個鐘。我一駁佢咀，佢就開始發癲，不停打牆同打門，然後喺度大叫鬧人。佢成日同其他親戚講話屋企人淨係偏心我，唔當佢係仔，喺度講我哋壞話。明明我屋企人對佢好好，冇人肯請佢，我阿媽阿爸特登幫佢搵咗份工。佢返咗咁耐工都冇交過家用，屋企人關心下佢，佢又講粗口鬧佢地好煩。佢冇問過我地就帶佢女朋友返屋企住，成日喺佢女朋友面前鬧我屋企人。
最難頂係佢每一日都喺度呻自己有幾慘，佢成日同我阿媽阿爸講我呢個細佬有幾乞人憎，又會同我呻點解有咁冇用嘅父母。佢仲好得戚咁講話自己已經叻過好多後生仔，至少冇吸毒同做隱青喎……
有冇人屋企都有個咁難頂嘅家庭成員？到底我有啲咩方法先可以擺脫佢，每一日見到佢我就好唔開心。我好想佢快啲搬出去住，但佢一定賴死唔走住係屋企。