#NSS個人
[Guest] 純粹想問下
話說有個曾經好熟嘅朋友無啦啦因為D好小嘅事而嬲咗我,而我到依家都仲未知佢到底想點。
嬲嘅源頭真係好小事,只係同佢喺ig傾偈嗰時有句嘢可能焫到佢,仲要係完全冇冒犯性個種,只係同佢講咗句:份卷我寫咗好多其他科嘅嘢落去咁。佢嗰時就好似已經有D嬲咗我。
其實我都唔知佢嬲啲乜,但係見佢覆我嗰句好似有少少火藥味咁,見個氣氛唔對路,我嗰時已經即刻試下救火,但係結果可想然之梗係唔成功。如果唔係我使乜投稿。
問題就嚟啦,本身諗住佢應該嬲番一陣就冇事,但係因為嗰時考緊試,唔係日日返學又見唔到佢本人,咁我唯有繼續send下message比佢,諗住睇下佢嘅反應再判斷下佢嘅情況啦。結果次次都係已讀不回,心知奶嘢,咪同佢道歉囉。
都已經道歉咗四五次, WhatsApp佢又試過、ig dm佢又試過、返學直接同佢講都試埋,佢都係繼續唔理我當我冇到,問佢你到底嬲我啲咩又唔答,咁我依家仲可以點？
講真,雖然咁講好似有啲衰,但係我事到如今都覺得自己冇錯。即係如果我嗰句冒犯到佢而我又冇道歉就話啫,但係依家都已經道歉咗咁多次佢都係唔理我,其實佢係咪已經當冇咗我呢個朋友？
其實我哋依家都已經中六,點解要到呢個時候先嚟玩絕交？而家小六細路仔咩？
如果一句對唔住就可以救得番段友誼,咁我講多幾次都冇拘呀,都已經唔係邊個錯邊個啱嘅問題,
我都只係唔想臨走先嚟搞段咁嘅遺憾啫。
雖然佢係冇講過佢嬲我啲咩,但係多多少少我都估到啲。大概就係覺得我讀書嘅態度好hea嗰種。咁其實佢睇唔到啫,唔代表我冇做過㗎嘛,咁我仲可以點？解釋？但係我依家只係一行埋去佢附近,佢就西我面啦喎。到底解釋嚟仲有冇彎轉？
其實我成日都想鬧佢,17歲人啦,可唔可以唔好成日為咗啲咁少嘅事而同人鬧交。雖然咁講好似好市儈,但係至少我知道出到嚟社會多個朋友好過多個敵人。或者咁講有啲聖母婊嘅feel,但係其實我有啲擔心佢呢種性格會唔會連累到佢。但係既然佢而家同我反咗面（正確啲嚟講係佢單方面反我面）,咁我依家仲有冇資格鬧佢？
我真心想問下大家,我依家可以點？係應該同佢一樣,以後見到對方,都當佢透明,就咁變成陌路人,定係再試下同佢溝通,睇下仲有冇得返轉頭？
呢件事已經困擾咗我一排,希望大家見到可以畀少少意見啦。
文筆差,希望大家明我講咩。
唔知佢會唔會見到,希望佢見唔到
Sor for 1999