#NSS社會
[CFSS] 我係 #NSS220104F 樓主嘅同班同學，既然見到咁多人都鬧學校，我都鬧埋一份啦。
12月14日，嗰日央視成班人嚟咗我哋學校採訪，佢哋嘅洗腦教育我相信大家係 #NSS220104F 已經見識咗，我就唔再多講。
我今日主要係講吓央視班人嘅態度係幾咁惡劣同埋自大。
首先，佢哋命令我哋要晨早流流8:00入到課室坐好俾佢嚟拍攝（我哋學校8:05先係閂校門）有位同學就遲咗少少返到嚟，結果冇得入課室，要喺走廊度罰企個幾鐘等央視班人拍完嘢，佢先可以返返嚟課室。
跟住就係佢哋對人極度冇禮貌。佢哋因為冇位set枝鏡頭，正常人都係會叫人唔該借借啦。不過央視嗰班人竟然直接推開個同學，仲用普通話講「走開！」你叫人借開唔該俾少少禮貌啦，你點可以當同學唔係野咁推走佢啊！有冇啲禮貌啊？
然後就係開始進行密集式洗腦教育。佢哋班人會將個鏡頭擠到去你面前影住你，根本上就係監控緊你。你俾佢影住嗰陣仲要扮到因為香港割讓俾人好傷心，你根本上係唔可以笑，你一笑人哋就會鬧你。我相信全班當時真係好想對住個鏡頭舉中指，大叫「NMSL」。我哋有自己嘅諗法同埋情感都唔得嘅，咁嘅話仲唔係洗腦？
去到9:15左右，央視佢哋以極度高傲嘅語氣同我哋講要再拍過。跟住佢哋慢條斯理咁set返支鏡頭。我心諗，你哋搬走啲嘢之前冇睇過啲片啱唔啱嘅咩？你好心就確認咗冇問題先好搬走啲嘢啦，咁嘅話只係嘥大家時間姐。個camera man仲要喺度大大聲話俾多5分鐘（最後拍咗成15分鐘以上）佢哋拍野，然後喺度大大聲命令：「你、你、你、你！走開！快走開！」勁串咁趕走啲同學。
呢度先係最無言嘅部份。因為個camera man要補拍返我哋睇國歌嘅片段，個camera man因為同導演意見不合，竟然喺個課室度嗌交。你哋冇plan好咗點拍嘅咩？喺度嗌交即係之前有溝通上嘅問題啦。唔該你哋討論好先再返嚟拍野啦。
最後最後，我哋學校係央視嘅老巢，一年總有幾次佢哋會嚟拍野。希望各位師弟師妹唔好遇到佢哋，可行嘅話，記住要拒絕。