#NSS家庭
[GUEST] 我尊敬你，因為你係我長輩，但唔代表你可以一次一次咁恰我
講返少少背景先，喺兩三年前，我老竇為咗退休有層樓可以住，不顧全屋企人嘅反對，堅持要我哋同阿嫲住。就係因為咁，我被迫犧牲自己同阿嫲同一間房，而佢就成為全屋最大贏家。
你哋可能覺得同一時間房瞓啫有咩大不了。但係我想講，因為我阿嫲以前長時間獨居嘅關係，再加上好鍾意儲垃圾，我間房大半都比佢霸咗之餘，仲要嚴重被佢影響到。我天生個鼻係好靈敏（人哋永遠聞唔到，我聞到嗰隻），同埋瞓覺好易被周圍環境影響到。但自從同佢同房瞓，我每晚都被陣老人味同埋白花油影響住，戴2個口罩先得。最慘係，作為dser，睡眠質素係十分十分重要，佢每晚瞓覺都開口講嘢，有時仲尖叫。終於度瞓到個時，佢三、四點幾起身⋯一起身就喺房到執嘢伴隨住啲十萬個膠袋聲仲有行路tab tab聲⋯想瞓安穩覺實在係來之不易！！
仲有，我哋屋企講明食飯期間係唔準有聲（包括講嘢丶食嘢jap jap聲）。阿嫲一嚟就打破曬所有規矩，佢仲耐唔耐都噴啲嘢落飯餸到，超噁心！超無禮貌！！之後有同老竇講返，希望佢希望叫阿嫲注意返少少啦，但阿爸就話「一家人怕啲咩口水啫，佢都未嫌棄你，你有咩資格嫌棄佢！你好唔孝順！」我心唸冇嘢啊嘛？！唔知係咪咁，我就比阿嫲針對咗。
講難聽啲，佢人前人後兩個樣嚟。之前有次暑假好熱成30度，正常人都忍唔住要開冷氣，開咗冇10分鐘就突然同我熄咗。仲喵嘴喵舌咁同我講「我好凍吖嘛」，但嗰時佢仲著住超薄嘅短T。我就同佢講「你凍就著返件長衫，再唔係就著件褸囉，你咁多衫又唔著。」可能知自己鬥唔過我，喺我阿爸面前扮曬蟹，流曬眼淚咁講「我好凍吖～個孫唔比我熄冷氣，唉算啦算啦⋯家和萬事興，唔好為咗咁就嘈啦」我真係反咗個白眼！明明我咩事都做錯，但偏偏比人鬧比人兜巴星又係我，又話我唔尊敬長輩，叫我抄弟子規⋯⋯
唔淨止我，好幾次我同阿媽都勸佢唔好執返垃圾筒啲嘢食返，咁樣唔乾淨唔衛生，出發點係為咗佢好。但係佢唔領情，仲話我哋想佢快啲死，早啲拎遺產等等⋯⋯⋯
想講我真係好委屈，明明每次我都冇做錯事，但每次都係我出事。就只不過係因為孝順係傳統美德，所以做細嘅只可以被長輩恰？！尊敬係雙向，我尊重你嘅生活習慣，跟住你四點幾起身；但係唔該作為長輩嘅就唔好仗住年紀大就欺壓我哋班細。
我唔知係唔係個個家庭的長輩都係咁定係我太敏感。呢兩年，除咗我阿爸，屋企個個都越嚟越睇佢唔順眼，每次都係因為佢而差啲令到條家散咗。我唔知仲可以做啲咩，想徵求各位嘅意見！！
thx