#NSS愛情
[GUEST] 如果只係一時嘅感覺，咁我寧願我哋冇開始過⋯⋯
Hello大家好，我就係嗰個恐怖情人，#NSS211107B嘅樓主！咁一個月前我呢段關係就正式結束咗啦⋯⋯ 雖然真係好唔捨得，不過我依家都嘗試放低，雖然有啲難啦，哈哈。
如果你冇睇過之前嗰個post，我建議你睇咗先再睇呢個po。
咁喺一個月多啲之前，我就發現佢好似唔太對路，覆message等成日佢先覆，我唔搵佢佢電話都唔打個俾我，咁我就進行左呢個「三日唔理佢計劃」睇吓佢會唔會主動黎搵我，但係三日過咗去佢完全一個message都冇，我唔想亂諗嘢，所以我就去搵咗佢個friend問吓佢係咪好忙，好多功課要做，但佢個friend話冇乜，而佢個friend都覺得好可疑，建議我打電話俾佢。雖然我嗰陣時已經有個不祥嘅預感，但係我都鼓起勇氣打咗個電話俾佢，而佢第一句「喂」嗰陣時我已經feel到佢嗰種冷淡，好似唔係好想同我講嘢咁，但係我都繼續：「喂，你呢排好忙啊？做咩唔搵我嘅？」佢又冷漠咁答我一句：「唔係好忙啊，我都唔知點解唔想搵你。」然後講咗少少嘢之後佢就提出左分手，佢比我嘅垃圾理由就係因為我喺佢好唔開心嗰陣時不停搵佢，佢覺得有人陪佢好開心，但係而家好似冇感覺，所以就想分手⋯⋯不過佢都想要返少少時間諗吓，所以就約咗係聖誕節之前傾掂佢。
我約咗佢香港時間10:00am傾嘅，但係我因為嚟到加拿大嘅時差問題，所以我就睇錯咗時間，遲咗一個鐘，雖然我有錯，但係我想問點解佢呢一個鐘裏面完全冇搵過我？咁到我call咗佢嗰陣時我就問佢點解唔搵我，而佢就話：「我見你冇搵我咁我咪以為你唔想同我講嘢囉。」喂大佬呀，我約咗你就唔會放你飛機啦，如果唔係我約你嘅意思喺邊度啊⋯⋯ 就算我真係唔搵你，咁我諗一個正常人應該都會Send個message問吓掛？咁我哋開始講正經野嗰陣時，我就唔希望氣氛太尷尬所以就用咗我平時開朗嘅聲線同佢講嘢啦，而唔知點解佢喺度笑？？？咁耐以來第一次向我笑⋯⋯ 我到而家呢一日我都好想知道佢做乜笑⋯⋯ 總之，我哋一路傾嗰陣時我哋講嘅嘢都幾諷刺，哈哈⋯⋯ 其實我嗰日有好多嘢想問佢，我亦都喺自己心裏面講咗好多次，但係我去到嗰日緊張到唔記得晒我想講乜，跟住去到收線之前我仲喺度組織緊句子，但係佢已經唔耐煩跟住cut咗我線⋯⋯ 佢個人有冇耐性㗎？！
我哋就係咁樣完咗我哋嘅關係啦⋯⋯ 我哋有講過繼續做朋友嘅，不過大家都知道呢啲嘢好少發生，甚至係冇可能，所以除咗新年同佢講句新年快樂（佢係已讀不回我）之外我都冇再同佢講過野。
雖然我都有啲嬲，但我其實本身都唔係一個好記仇嘅人，所以我都真心希望可以唔好冇咗個朋友，因為我哋仲係普通朋友嗰陣時，我真係好多謝佢肯聽吓我講嘢，因為我本身都係一個超多嘢講嘅人，而唔係好多人肯聽我講嘢，所以我真係好多謝佢，不過既然佢唔想同我講嘢，我都唔會勉強佢啦，費事搞到我好似嗰啲不停黐住佢，超煩嗰啲ex。
總括下我想講嘅嘢啦，其實如果你係突然間覺得你鍾意一個人，咁唔該你就唔好同人拍拖啦，俾多啲時間你諗吓，曖昧下先，因為如果只係因為一時間嘅衝動，之後一定會有一個人好似被刀插咁痛，日日喺度諗自己做錯咗啲乜嘢，令到呢段關係冇咗，亦都其實可能有少少陰影。
超多謝大家肯睇晒 sorry for 1999 😖😖😖