#NSS家庭
[Family] 屋企出現咗好大問題……
交代下背景先媽媽係護理員 爸爸係的士司機
一切都由一月一號嗰晚開始
嗰晚媽媽係我爸爸手機見到其中一個乘客msg我爸爸
話「X先生 明天來接我」
咁我媽媽就即刻去問我爸爸係邊個啦
咁我爸爸都即刻用平靜嘅語氣答話依嗰係熟客每日都係8:30由xx地方去xx地方
之後我媽媽就好似俾人撻著咗咁
大大聲咁講話「嗰女人連地方時間都唔俾你就直接叫你去接佢？」
咁我爸爸就好自然咁再講多次話係熟客且有其他人同行
之後我媽媽就開始「熟到咁都唔知係咪你出面有女人每個月過錢俾佢」
咁我當時就係房溫緊書本身都唔打算理依件事
諗住佢地講兩句就完
但係都係抱住食花生嘅心態開咗少少門偷睇
之後就不斷不斷聽到佢地越嘈越大聲越黎越勁
無非就係圍繞住我爸爸出面有女人依嗰話題
我聽到我爸爸佢不斷解釋話冇 之後我媽媽就開始扯到去平時買餸啲嘢 總之就係乜嘢日常小事都拎出黎鬧
咁我爸爸就開始忍唔到 就話我媽媽係痴線
聽到依句之後我媽媽就痴咗線咁係咁揼我爸爸
之後我見到咁都唔想多睇 就閂埋門繼續做自己嘢
突然間我就聽到靜曬 出去睇下佢哋係咪停戰
見到我媽媽坐係地下喊 我爸爸就係床上面
媽媽勁大聲咁講話爸爸踢佢肚 話佢家暴
話要去報警 之後就趕我爸爸出去 話叫佢唔好再翻黎
咁之後爸爸就叫我幫佢搵酒店 住下先睇下點
我本身諗住都冇乜嘢俾佢哋分開下冷靜下先
免得訓埋一齊又嘈三嘈四
於是就上網幫手搵酒店 爸爸就出咗去街到話冷靜下
無啦啦我媽媽衝過黎 指住我話「我地嘈交全部都係因為你」
爆曬粗口咁係咁係咁鬧 不斷話我又幾賤幾衰 話我挑撥佢地關係
我聽到第一下都真係呆一呆 乜你地為咗嗰乘客嘈都關我事？
我就冇理佢 入咗房免得又有第二次大戰
之後我等佢冷靜啲就出去同媽媽傾計
我媽媽就話一定要離婚 屋企層樓要歸佢
仲話咩當初因為買樓時話因為未夠7年會重稅
所以由爸爸俾全款同埋寫佢名
之後再買大陸層樓就寫咗雙方名
講完層樓就話要我爸爸淨身出戶 乜都唔拎走
仲話我一定要跟佢點點點
我諗住佢今次由係講完就算
因為媽媽佢每次一鬧交或者少少野就話「唔滿意咪離婚囉」
口爽完就冇咗件事咁
總之後面就係不斷講話離婚後要點要點
—————分割線（嘈交之後嗰幾日）————
依幾日我都係隔一日就同爸爸食飯
因為爸爸佢一直都冇翻都屋企
但係食飯嗰時佢不斷話媽媽鍾意係依間餐廳食乜做乜
句句話都離唔開我媽媽
我就趁佢去廁所偷偷拎咗佢手機睇
見到佢係鬧交之後就即刻同嗰個熟客講話
因為身體原因 冇繼續工作 無法接收你嘅order咁樣
咁嗰客都話ok搵第二個司機咁啦
本身我以為都冇嘢 差唔多意味依場戰爭就到此為止
點知呢又開始黎料
爸爸係出面住到一個禮拜左右
我問佢話咁樣一直住酒店唔係辦法
不如搬返黎住咁
我爸爸就唔肯話驚媽媽佢唔同意
到時候返咗去再俾佢趕出黎就仲樣衰
咁我以為都不了了之 爸爸會繼續住酒店咁
再過多幾日我媽媽就突然黎問我依幾日爸爸住邊
係咪住女人屋企 係咪出去同女人上床咁樣
我就話唔係佢住酒店 唔翻黎係因為驚你唔同意
佢問我拎咗爸爸酒店房number 直接鏟咗上去
之後都唔知點樣 爸爸就翻黎住翻
爸爸先同我講話前幾日佢諗咗諗決定要出去租樓
並且已經睇好簽埋約同俾錢
搬翻屋企住之後呢就即刻約房東話傾毀約嘅詳情
我媽媽聽到呢就同我講話
「你睇下佢 一早就預謀好搬出去住 一定係出面有女人」
之後嗰幾日我見佢地都好似冇嘢咁
——————————————————————————
到最近
爸爸就依排咳得好勁 check咗唔係covid
咁爸爸咪去睇醫生 點知睇咗次都係冇用
我發現啲藥係抗過敏咁我建議爸爸換間診所再第一次
反正今次療程都食完 爸爸都同意
咁係爸爸咳嘅依幾晚我媽媽都係旁邊講話
「叫你去醫院睇又唔去（媽媽唔知爸爸有睇醫生）
叫你照肺又唔去」總之就係講嘢有骨咁講一大輪
講啲嘢難聽到一個點
之後又開始嘈 不過今次係單方面媽媽不斷指住爸爸鬧
第二日我就照常同爸爸一齊食午餐
爸爸嗰樣苦到成個苦瓜咁
先知依幾日車媽媽返工嗰陣日日俾佢指住鬧
原因係係的士上面搵到包薄荷菸
我媽媽又話佢出面有女人
總之依排我媽媽就不斷同我講話爸爸出面有女人
話爸爸咁大歲數唔退休係要保養出面啲女人
話爸爸每個月定期存入我銀行戶口嘅錢係佢過俾其他女人洗
反正就係一口咬定我爸爸出面有女人
我同媽媽解釋銀行戶口啲嘢就話我俾爸爸洗腦
依家嗰問題就係日日屋企都家嘈屋閉
再唔係就係苦瓜面 媽媽成日講嘢窒爸爸
不斷俾說話佢聽 我問媽媽點解唔離婚就話要吊住爸爸
等佢唔好受
我都唔知媽媽想點 每日都見佢係到指天指地
每次都要鬧埋我咁 爸爸都唔知係話定唔話好
————————————————————————————
尋日嘅事
事關就係遲咗幾個鐘開飯
食完飯爸爸就話去洗碗 執咗啲碗碟入去
我就發現爸爸平時習慣睇嘅節目開始咗做
我就叫佢話睇埋再洗 免得skip咗集追唔到啲劇情
睇到一半我媽媽突然發爛渣話我爸爸乜都唔知
叫佢去洗碗都唔去 當我媽媽係工人咁奴役佢
反正就係又開始鬧鬧鬧鬧鬧 不斷嘈
————————————————————————————
題外話
媽媽因為放工夜
所以轉咗由爸爸買餸
咁爸爸乜都識就係唔識買菜
咁有時就會買錯菜或者魚
返到屋企我媽媽見到又講嘢帶骨咁窒我爸爸
差唔多每日都係咁
直至尋日嗰電飯煲內膽壞咗
爸爸買咗嗰不銹鋼嘅用住試下
我媽媽又係到窒佢
咁我爸爸真係忍無可忍就講左句
「我做乜都係錯 買乜都係錯 反正只要係我買就係錯」
最後餐飯就係大家苦瓜面咁食埋落去
——————————————————————————————
講到最後總之就係我唔知可以點
之前試過調解都俾佢地以「我地大人嘅事你唔好插足」唐塞咗過去
日日屋企都家嘈屋閉 唔知可以點
好無助 其實我唔介意佢地離婚
我淨係想要一個安靜嘅地方休息做自己嘢
而唔係訓訓下覺會因為佢地鬧交所以嘈醒
依家自己又冇經濟能力搬出去住
學校又冇宿舍咁
求求大家可以指點下俾啲建議
sry for1999+錯字