#NSS學業
[VC] #NSS220119e
Title: 再分享下我想drop通識嘅心路歷程
大家好,我係一個禮拜前話想drop通識讀公社嘅樓主。
本來想公佈問卷結果,但因為投稿冇得放hyperlink,手機app又冇得copy條link,所以搞到回覆數量極低,得個位數,所以就唔公佈啦。
不過啲comments都好一面倒,叫我唔好drop通識,好好珍惜讀通識嘅機會,又話公社科冇我想像中咁易,而且好洗腦,所以都知道大家嘅睇法。
其實我都知係自己問題,不過喺度一直逃避,唔想面對。初中嗰陣,我好期待讀通識,到F.4上學期仲搞得掂,但自下學期開始,啲嘢就深咗,又開始要做卷二嘅題目,要喺極少資料下寫千字文, 所以就搞唔掂啦,嗰陣好多功課都諗唔到,結果遲交,咁啱下學期嗰陣,教育局宣佈將通識科改為公社科,於是我就開始萌生drop通識嘅念頭。
但嗰陣我對公社科嘅想像好模糊,到之後公社科嘅詳情開始出,我對呢科嘅理解都愈來愈清晰同具體,想drop通識讀公社嘅念頭都愈來愈強烈,喺我心入面揮之不去。
到F.5,我更加一直想Drop通識,不斷幻想降班到Form 4讀公社科,唔駛再對住通識呢科,又或者唔讀通識,2023年DSE都唔應考通識,基本上一喺上堂要做題目,又或者對住啲通識功課,測驗,考試嘅時候,呢個念頭就會彈出嚟,行到四樓F.4班房走廊嘅時候,又會諗起佢哋讀公社科,唔使讀通識,好羨慕佢哋。
由升F.5開始,我就一直呻通識好難,話要drop通識,我嗰班嘅同學,同同我一齊上elective嘅同學,仲有所有F.5教我嘅老師同學校社工,都知我想drop通識,佢哋睇到我啲post,應該都知道我係邊個。
而我覺得通識最難最想drop嘅地方就係IES,原因上個post講咗。我嗰陣諗住做嘅題目係應否取消校本評核,因為我好憎IES,好唔想做,好想佢取消。如果教育局冇取締通識,我應該會做呢啲題目:
香港政府應否取消通識科?
香港政府應否將通識科改為選修?
香港政府應否取消IES?
總之我就係好想drop通識啦,尤其係IES,所以最終IES取消咗,我勁開心。
我想drop通識讀公社到一個點,就係變到對公社科極度好奇同有興趣,試過上網睇呢科嘅教材同試卷,係咁幻想自己讀公社科,唔使讀通識。我理智上係知冇得drop,點都要讀,但情感上仲未死心,承認呢個事實。學校考試嗰排,我試過問F.4同學仔借公社科notes睇,仲諗住問佢哋借公社科試卷睇。notes就睇到,但試卷就因為兩form考試時間唔同,搵唔到人借。
我喺F.4考公社個日,喺社工室度搵F.4同學借公社科試卷睇,結果嗰度得一個F.4同學,佢份卷已經被碎屍萬段,扔咗落垃圾桶度,我都冇時間重組佢,要去下一節考試。(完咗之後返去,啲碎片己經唔見咗,應該係佢執返,所以冇得睇)
考試嗰份通識卷對於我嚟講好難,又唔夠時間做又諗唔到咁多point,我都恨不得將佢碎屍萬段,扔落垃圾桶,但我之後又要對卷,所以冇辦法。考哂試之後嘅週末有啲時間,我就喺呢度投稿,宣洩下我一直以來對通識嘅不滿,兩日之後就出咗喇。
之後嗰個禮拜就對卷,我好好彩,通識喺完全寫唔切(見上post)嘅情況下啱啱好合格,分數如下:
卷一: 17/34
卷二: 10.5/20
總分: 101/200
(考試80%,兩份卷weight過,平時分20%,計功課測驗等)
我當時鬆咗一口氣,不過諗起之後仲要捱多年通識就驚,但又諗到通識dse攞2就達標,應該冇問題,所以都放心咗少少,冇之前咁想drop通識。
冇幾耐我想drop通識嘅投稿就post咗出嚟,like比我想像中多,但下面啲comments絕大部分都叫我好好珍惜讀通識,咁惟有唔好諗drop通識,繼續讀埋佢,希望下次都合格啦。