#NSS愛情
[GUEST] 小妹今年07 鍾意咗一個男仔差唔多五年（小學鍾意到依家）
直到中一尾開始同佢拍拖，但係佢中二轉左去間男校，所以少咗聯絡佢，同埋屋企人俾我約男仔出街，所以我哋一直都係用手機聯絡。
其實佢之前一直都好好人 ，幾純品 ，對我都幾好
但係佢轉左校之後好似比人教壞咗。
有一排佢成日都搵我 叫我send啲唔著衫嘅相比佢（我就梗係唔show佢啦），仲話佢自己會影返自己啲私密器官send返比我。然之後我見到佢新學校嗰啲朋友IG都好鍾意repost啲黃色迷因出嚟，仲要不斷開車，所以我覺得佢應該係俾佢學校嗰啲人教壞。咁我嗰陣遇到呢啲情況嘅時候冇同屋企人講，因為我擔心佢哋知道之後會逼我同佢分開，而我真係好鍾意佢。佢煩左我幾個月，我都係堅決用啲方法避開佢呢啲問題，所以最後都冇事，但係我到而家仲係有陰影。因為佢之前咁樣搵我，令到我一直都覺得好唔舒服（佢咁樣做根本就係性騷擾🤡），但係我都出於鍾意佢冇直接同佢講自己嘅感受。
但係又過咗一排之後，佢好少搵我（接近成半年冇contact過我），咁我當然係好掛住佢啦，於是就同佢講左聲hello，點知佢成個月都冇覆過。
大家可能會覺得佢學業繁忙，但係嗰陣佢學校放緊假，加埋佢日日都online，所以我覺得佢好似敷衍緊我（直接啲講 佢應該係唔想搵我🤡）。呢種情況仲係唔止一次，我有時有啲重要嘢要問佢，或者佢好偶然覆一覆我，之後我嘗試再聯絡番佢嘅時候，佢成日都係不讀不回，但係佢依然係日日上線。
佢偶然會覆我多啲（即係可能一日覆幾次）但係之後三個月潛水。我自己唔認為自己係大痴身嗰一隻女仔，如果見到佢唔覆我嘅嘢，我通常都可能一個月至兩個月先搵佢一次（內容都係send個hi之類），或者有特別節日先搵佢，但係佢係啲特別節日都係好hea咁樣send幾張貼圖俾我，甚至乎都係不讀不回。
咁嘅情況已經持續左大約九個月，我係呢九個月時間內諗通咗好多嘢，感覺佢對我忽冷忽熱，加埋覺得佢之前叫我影相呢件事好冇道德。同埋喺小學嘅時候佢做咗一啲令到我好失望嘅事（詳情唔方便講咁多⋯⋯），搞到我情緒病越嚟越嚴重。
有時候我想離開佢嗰陣，佢偶然覆下我嘅message已經可以令到我超級開心，拋開分手嘅諗法，然之後就不斷循環以下嘅一個loop（即係佢唔覆我嘢，我好唔開心，想分手，之後佢覆我嘢，我心情好咗好多，又決定繼續留低，然之後佢又唔覆我，就係咁樣不斷惡性循環落去）。
我唔知自己應唔應該同佢分手，但係我知道我好難先放得低佢，所以而家唔知要點做。求吓各位情場高手為小妹指點迷津⋯⋯