#NSS愛情
[Guest] 其實點先分到係友情定係愛情？
首先我今年中六，repeat咗一年，由細到大都係讀男女校嘅。有一個好細個已經識嘅朋友(下稱A)，佢細我一年，細個因為屋企人識所以就識咗，大家都係女仔，又好岩傾，大家都會打下波，中意嘅嘢都好似，成日都會一齊玩。
我識A咁耐以黎，都一直覺得自己當佢係一個好好嘅朋友，可能因為佢係女仔又差唔多大，我同佢好夾，我有咩都會同佢講，大事小事好，有時會喊住打比佢，有開心事又會想同佢分享，即使好小事都好。佢都係一樣，就算大個咗之後都成日傾心事，可以傾到天光都唔瞓。而由於我哋屋企都識，所以都好放心同對方去街，夜晚唔番屋企瞓都冇問題，都成日留係對方屋企過夜。
但係一直直到今年年頭。
由於我哋真係好熟，電話密碼嗰啲都唔會唔知，好自然就拎起對方電話黎玩。無意中有一次比我發現到有一個男仔成日搵A，同佢傾計，然後A每次覆佢聽佢啲錄音都會笑得好開心，而我發現咗之後覺得好唔開心，我有問過A呢個邊個嚟架？A話係新識嘅朋友，好好傾好好笑，之前同佢傾天光。
我嗰下真係個心沉咗一沉，第一下反應係「我比人取代咗。」嘅感覺。我覺得好傷心，好似比人搶走咗佢咁。於是我就好唔甘心，嗰一排成日約佢出街呀，成日上佢屋企，好想搶番A番黎。
而A都開始覺得有啲唔對路，點解我咁痴佢成日約佢？所以就開口問我:「其實係唔係發生咗啲咩事？」我因為呢句亦都決定咗要同佢坦白。我話：「我唔想你比人搶走，我唔想你同個男仔傾計，或者係唔好比我見到。」然後佢笑咗一笑，一下攬住我話：「好啦好啦，以後唔會。」呢一下，我竟然有啲心動嘅感覺？
講番啲背景資料先，我18歲，拍過兩次拖，都係同男仔拍嘅，只係做到stage3。(由於份人有少少保守同怕醜啦)
而A16歲，讀中五，冇拍過拖。
而我就較女性化打扮，中意着裙化妝set頭，會保養 敷 mask 嗰啲
A呢就男仔頭少少，有得着褲都唔會着裙，唔會化妝，搽嘢嗰啲都係我叫先會做，但佢又唔算係tb
而家問題就黎啦。
自從嗰一次之後，我好似番唔到轉頭。
我不停問自己，點解A識男仔我會呷醋？
我真係好confused，嗰一排完全唔敢面對佢，好驚自己會表現咗啲咩出嚟。
冇幾耐就到我生日咗，佢就幫我慶祝咗一大餐，食完飯之後我哋就出咗去行下。嗰陣都已經10點幾11點，我哋行咗去啲冇乜人嘅海傍到，因為我哋都好中意海，又唔中意咁多人，所以我哋都好中意咁行。然後我哋一路有傾有講係到笑啦，突然間我kick一kick，下意識就捉住佢手臂扶一扶啦，然後佢就捉住我隻手，放落佢隻手到拖住我黎行，話：「睇住呀。」然後一路行咗半個鐘都冇放過，嗰陣時都幾熱，出哂汗都冇放手。
我嗰下真係心跳加快，面都紅哂好怕醜，我哋就算好frd好 close，都甚少會真係咁拖住行。
呢次之後我更加confused，到底我哋只係朋友定已經超越咗？
我哋之間好似已經有啲唔同咗，會講啲幾flirt嘅嘢，好掛住你呀，早啲瞓呀，今晚冇你係隔離瞓唔着，想拖你隻手 呢啲呢啲
而大家望大家嘅眼神都唔同咗，大家都好想保護大家，撘車好迫會好自然攬住對方條腰，怕比人抽水，食飯紙巾會分一半，會幫對方綁鞋帶，行街會拖住扣住對方隻手，係屋企瞓覺會瞓一張單人床，會着對方屋企嘅衫，直接係面前換衫都冇問題。
我真係好confused，到底我哋算係啲咩？
我覺得自己已經番唔到以前咁，但到底我係唔係中意佢？我對同性戀完全唔反感，甚至覺得自己可能係，但我只係想分點樣先知係友情定愛情？又或者點先知道對方係唔係中意我？
所以想拜托各位，可唔可以幫我睇下？到底我哋之間係唔係已經有第二種感情？
我真係完全唔知點做好，我就快會畢業，雖然唔一定會出去讀書，但係我哋嘅距離又會遠咗，好驚我哋會疏遠..
唔知道大家可唔可以比啲意見我，教下我點做先好..
好多謝大家咁長咁亂都睇哂🙏🏻🙏🏻
希望可以幫下我呢個小妹妹😭🙏🏻🙏🏻🙏🏻🙏🏻
Sorry for 1999