#NSS學業
[[元朗某間中學]] 其實係我問題定係點？唔知有冇人同我一樣有時都會咁？
是咁的，小妹而家f.2。話說仲有兩個星期就要大考，今次呢個考試佔六成分，小妹成績而家中等？(老師同父母認為係中等但係我就認為係中下) 最近學校出咗考試嘅timetable，當我睇到考試timetable嘅時候我都覺得冇乜嘢，冇任何緊張擔心嘅感覺，因為我淨係知而家日日都有唔同嘅測驗默書project，已經心很累，每日chur到盡嘅生活，我亦都習慣咗呢段好長嘅日子。呢排每一日都瞓得嗰兩三個鐘，學業同埋精神壓力真係好大，當然我知全香港唔知得我一個學生係咁 ，全香港中小學生而家都基本上日日都好大壓力，又或者可能我冇資格講我大壓力，如果我咁都話我大壓力嘅話，咁高form嗰啲師姐師兄面臨嘅又係乜嘢？難道今年文憑試考生所面對嘅唔係壓力？喺呢段好忙嘅日子入面，小妹想搵朋友傾訴，但又唔想，有時可能同朋友講咗件事出嚟，佢又未必會安慰到我，久而久之我就覺得呢啲嘢收埋喺心入面算，冇同朋友講到我心入面嘅諗法。
最近小妹好唔開心，當然每日有咁多測驗默書亦都係其中之一個因素導致我唔開心，不過呢個都只係其次，主因係我妒忌其他成績好嘅同學。小妹好鍾意中文呢一科，個中文老師亦都好好人，有時有啲作文又或者默書測驗成績好嘅學生都會畀佢表揚，咁自問小妹嘅中文成績其實唔係話好top，因為小妹嘅中文底子唔好，都係f.2上學期先開始鍾意中文，所以基本上小妹都係喺f.2先開始努力(中文科)。最近我哋中文科都比較多測驗，作文同埋默書等等，老師亦都陸陸續續改完並派返呢啲測驗作文默書畀我哋，喺佢派之前佢都會表揚一下全班成績比較好 又或者喺該計分活動嘅頭三名學生，雖然小妹都試過畀老師喺全班面前表揚，但係大多數都只係默書100分，好少會係測驗方面……作文亦都試過，但係唔係多…… 有時小妹真係好妒忌嗰啲畀我哋中文老師當著全班面讚嘅學生，我哋嗰班有一兩個中文學霸每次測驗默書作文都勁高分，因此當老師次次派番呢啲計分活動嘅時候都一定係會讚揚呢幾個學生提及到佢哋嘅名。小妹聽到之後就會好呷醋好妒忌，其實我想問我有咁嘅感覺係咪好衰？咁自己實力及唔上人有資格妒忌？(我唔係話其他同我一樣情況嘅人 ，我只係話緊我自己，希望大家唔好誤會) 當我聽到老師讚揚佢哋嘅時候 ，我就會問自己呢啲機會幾時先輪到我，雖然我都有試過畀老師表揚，但係我都想好似嗰啲神奇學霸咁樣樣，基本上次次派番嗰啲成績都可以畀老師表揚，因為我覺得咁樣好有成功感。即係當你好努力好畀心機去溫嗰一科，從而不但獲得好成績，仲要畀老師表揚，嗰下其實真係得到好大嘅滿足自己真係會好開心。同時我又會怪責自己點解今次做唔到好似佢哋咁高分，然後自己就會好妒忌佢哋，但係佢哋又係小妹嘅好朋友，就係因為呢樣嘢更加唔開心，正正因為佢哋係自己嘅好朋友更加想超越佢哋，但係我嗰種超越唔到嗰種羨慕妒忌同埋恨就越嚟越深，當然我唔會有咁嘅諗法而同我嘅朋友絕交又或者唔鍾意我嘅朋友。但係就會覺得自己好冇用，點解我啲朋友咁勁 但係自己就咁廢，我覺得自己配唔上佢哋，開始好大壓力，覺得我自己呢啲學渣根本就唔可以同啲學霸一齊玩，好似影響或者影衰佢哋咁，亦都係因為咁，我唔想同佢哋去傾訴關於呢啲嘢，唔想畀佢哋知道我對於呢啲嘢嘅諗法，我驚佢哋覺得我好小家，點解咁嘅嘢都好妒忌？就算同佢哋傾訴其實都會有啲尷尬，咁唔通我啲朋友聽唔到講會特登陴低自己嘅成績畀我爬頭咩？可能佢哋會安慰我，但係如果呢啲安慰嘅說話係出自佢哋口中，其實都唔係有幾大嘅作用，我唔係話我嘅朋友安慰係冇用唔係話佢哋唔好，但係因為我而家妒忌嘅就係佢哋，所以如果佢哋因為呢啲嘢而去安慰我嘅話，基本上都係嘥口水，因為我聽唔入耳，我只係會覺得你成績咁好，你同我講呢啲冇用㗎喎。
每次都我聽到我哋嘅中文老師去讚我身邊有幾個學霸，我又覺得好唔抵，點解又係佢哋？究竟呢啲機會幾時輪到我？定係我呢一世同高分係無緣？呢種感覺係心入面真係好難受，我想問問大家意見，其實我有咁嘅心態係咪好衰？我自己好亂，其實有時我已經盡咗力。但係實力都未及得上班上面嘅幾位學霸，真係好頹好絕望。就好似我哋今日中文測驗咁，測驗嘅前一日我都好努力，但當我返到學校突然間就好想放棄？我朋友問我，你唔係好鍾意呢一科嘅咩？做咩突然間想放棄？佢亦都知我好執著中文呢一科，好緊張中文科嘅每一個計分活動，同埋喺老師面前嘅表現，所以佢先咁樣問我。然後我就咁樣答佢，算啦溫嚟有鬼用咩，溫咗都係低分㗎啦，又唔會高分嘅，反正高分嘅咪又係嗰幾個，我完全係屬於一個徹底放棄嘅狀態，因為我知道我溫咗其實成績亦都可能係未如理想，同埋高分嘅一定唔係我，咁勤力咁樣背同埋溫又有乜嘢意義呢 ？反正我嘅實力就係咁差，永遠都超越唔到人哋，雖然最後，都順利咁樣樣考完呢個中文測驗，但係測完驗之後先醒起自己錯咗好多唔小心嘅位，好大意嘅mistake，加加埋埋應該都扣咗十分。皆因我今日測驗嘅狀態都唔太好，因為測驗嘅前一晚我都只係瞓咗兩個幾鐘，測完驗之後，成個人都處於一個低迷狀態，甚至返到屋企喊，因為我淨係知今次嘅中文測驗會好低分，雖然應該話就話唔會唔合格，但係我本身要求嘅係高分，但係而家扣扣埋埋前前後後都扣咗成十分，越諗就越嬲自己，點解當時抱住呢個懵盛盛嘅狀態去測驗 ，都唔打醒十分精神，明知會影響自己中文科嘅名次同埋平時分….跟住就喺度喊，好緊張好緊張，好驚好低分，然後再諗返起而家距離考試只係淨返兩個星期，但係我只係想問一個問題，究竟我呢個學期學咗啲乜嘢？我答唔到我自己，短短嘅兩三個月咁快就考試(我哋啱啱3月尾先考完上學期嘅考試) 話咁快就到f.2最後一個考試，我而家真係好驚，但係我又唔開始溫書，唔係因為我懶唔想溫，我覺得自己係冇嗰個好嘅狀態溫書同埋呢排比好頹好唔開心嘅情緒都影響著我，導致我難以專注 ，然後 一日一日就咁樣過去。
真係覺得自己好冇用好頹廢，廢到極點。點解好似乜嘢都及唔上人咁，乜嘢都落後於人，但係明明我都有出力，點解偏偏我做唔到最top嗰幾個？中文堂經常性聽到自己身邊嗰幾個好朋友嘅名，就會好妒忌佢哋，恨不得佢哋嘅成績突然有日直線下落 ，考試唔好考得咁好，或者冇溫書考零蛋。我知我咁樣諗係好衰，但係真係好難控制自己冇呢個念頭，我唔知我自身算唔算係妒忌心強，咁樣應該算？
其實咁樣真係好辛苦，每次中文堂都聽到係身邊幾個好朋友學霸嘅名嘅時候，真係非常非常非常之妒忌，但係呢啲嘢冇可能當住佢哋面前講，於是默默收埋喺心入面，但係咁樣真係好攰，所以就想上嚟問問大家意見之餘亦都畀小妹有個純粹發一發洩嘅少渠道，希望大家唔好介意我喺度發放負能量。好多謝用咗咁多寶貴時間睇到你呢度嘅你 sorry for 1999🙇♀️🤦♀️