#NSS愛情
[Guest] Admin pls Po ig
長文慎入 sor for 1999
明知同呢個女仔冇可能，都唔知點樣答佢…
小弟十四歲，就讀某band1 男女校既中三生。有一個我自Form 1就識嘅女仔，三年都係同一班。話說同佢熟嘅方式都幾搞笑，form1嘅時候老師分組做project，咁啱就係我哋兩個。放學之後本身我返緊屋企，但係佢係巴士站拉左我去圖書館一齊做project。做到八點，我呀媽問我點解咁夜都未返，我話我同同學喺圖書館做緊project，佢話唔信。然之後佢咁啱又喺度講嘢，咁啱我阿媽又聽到，之後笑咗幾聲就問我係咪女朋友，我就話梗係唔係女朋友。收咗線之後見到佢偷笑住咁樣望住我，然之後故事就喺呢度開始。
之後，project次次佢都搵我一齊做，中間亦都經常見面，去食飯，一齊做功課，都可以話係彼此最好嘅朋友。去到某一個點，我發覺我諗嘅全部都係佢，佢鍾意食咩，鍾意做咩，我都知道。搵到一個點，我發現當佢拖住我隻手（唔知佢有意無意啦），會有一種心動嘅感覺。有好多男仔friend都叫我去表白，我話唔好啦，有機會連朋友都冇得做。
一直拖一直拖，直到一個月前，我屋企有一個晴天霹靂嘅消息：我要移民。開始我都冇覺得好唔開心，同啲friend仲可以網上聯絡，所以一直都冇同其他人講。直到一個星期五，個女仔同我表白。嗰日我送佢返屋企，佢係屋苑樓下同我講話佢鍾意我。個一下，我叫佢唔好諗咁多，之後再講。佢走之後，果下，我喊咗。自從升小學以來，我第一次喊。我唔想走，我唔想拒絕你，但係我無奈要走，我亦都唔知點樣同你講。
請問大家我應該做啲咩？明明係深愛佢，我唔想拒絕佢…
如果你睇到呢度就多謝你，sor for 1999