#NSS愛情
[GUEST] 男人有上進心係咪必需？
兩個都中六，佢留咗兩年。我最後一個月急起直追緊，底唔差所以進度幾好。但佢係留過兩年，好多科都係勉勉強強嘅程度，又唔肯去温去讀，係摷埋notes俾佢都唔願睇嘅程度。
當初會一齊係因為佢好識關心人，所以唔夠兩個月就一齊咗，到而家一年幾。佢其他方面未必好好，可能因為第一次拍拖唔熟，但佢好聽我意見好就我，我鍾意食一樣野會係咁食，佢就陪我食到我厭為止，我揀飲擇食都唔嫌棄我。唯獨係要做野呢方面，佢其實唔係蠢，但真係好懶，懶到我同佢講好多次今屆係易咗入大學，只要肯讀一定得，佢都唔理我，繼續日日打機。
原本諗住睇開啲，成績唔代表一切，直到佢尋日話要我將來讀到大學返黎養佢，我個心即刻超唔舒服。我睇唔慣佢咁大個人都冇啲掙扎，得過且過嘅態度。我讀書係為咗將來嘅自己可以獨立，唔使邊個養我，就算俾男人拋棄都可以自己養自己。可能我諗野太傳統，我覺得男人要女人養係無能嘅象徵。佢講嗰下可能只係玩笑，但由佢一向嘅做事態度黎睇，我覺得唔係冇可能。有諗過要唔要同佢講清楚，但我真係冇信心可以說服到佢去温書。
撇除呢樣野我地一齊得都幾開心，但一諗起/提起呢樣野我就覺得好厭惡。男人有上進心係咪必需？將來嘅野好難話得埋，可能佢突然有機會打到份好工，就唔會有上面嘅問題，但現實真係有咁理想？萬一到時佢又成舊爛泥咁錯過曬啲機會，咁真係會變我養佢架喎？我又唔想咁樣，我個人而家好矛盾。