#NSS個人
[Guest] 長文慎入！
見咁多post都講去外國，所以想講下自己嘅經歷同少少嘅煩惱(主要都係想發泄下)。
btw希望認到我嘅都唔好講出嚟🙆🏻♀️
入返正題！小妹今年16歲，係喺2020年中走(全家一齊移民，去嘅國家係非英語國家，講意大利文，不過屋企有人識意大利文，所以開頭都冇乜嘢要太過擔心)
自己本來對呢樣野都冇乜特別感覺，走嗰日冇喊冇興奮。因為嚟之前係完全唔識意大利文，所以到步就開始學同埋搵學校。開頭搵學校嘅時候搵到一間全英文嘅國際學校，然後就去咗面試，面完之後間學校話填咗form，交咗就入得，咁都覺得間學校幾好。結果後尾阿媽喺網上見到另一間學校，係一間local嘅語言高中，話入面有中文同英文讀，我已經有兩科唔洗太擔心(最後揀咗中文英文同德文)，唔會太難(開咗學先發現間學校喺區內好出名，有200幾年歷史，所以好tough)，咁嗰陣全家都唔係對呢間學校十分清楚，都認同阿媽講嘅嘢，就去咗面試，一面完就話收，咁就冇乜特別諗。
開學之後，第一年因為意大利文真係搞唔掂，所以學校安排咗個額外課程比我學意大利文，而且呢到啲同學好好，我有咩唔明都會幫我，仲會主動同我傾偈，開頭都幾輕鬆。直到幾個月之後，因為疫情嚴重左好多，全部課堂轉晒做online，開始好多嘢都跟唔到，後尾仲成日專注唔到，情緒好唔穩定，本來喺香港有見開社工，所以先穩定到，但嚟到呢到一個可以同我傾嘅人都冇，同屋企人講又話明第一年會辛苦啲要努力，然後就不了了知，係有時可以同香港嘅朋友講幾句，但佢哋一係就f3一係就f4，好多嘢要忙，所以好少會搵佢哋傾。最後係因為我日日喺屋企喊，喊到好難先停到，屋企先開始同學校傾仲有搵社工，之後搵到個識英文嘅社工，學校仲介紹咗個補習比我，啲嘢先開始穩定，亦都夠分升到第二年。到今年，開學第一個星期，因為屋企有人中咗(我冇中到)(同埋有時打咗針都未必有用，大家真係要好好保護自己)，所以成個星期都要隔離，冇得返學，已經好唔開心，返咗學一個星期之後就病咗，又係成個星期都冇得返，覺得個天好似玩緊我咁。開始有得返學之後，要跟返晒啲嘢，好在唔係教咗好多嘢，好多科都跟到，但History同Science係完全聽唔明，上堂淨係瞌到眼瞓，乜都做唔到，同啲老師又溝通唔到，仲要個個星期都有test(呢邊冇考試，所以test會多少少)。最後Science嗰個就話Test可以比英文我，都好少少，但都係差一分先合格(呢邊10分制)。History個老師就同我講個test只係要我翻譯英文去意大利文同埋會搵人幫我翻譯完啲要test嘅嘢之後比我溫，最後佢test前兩日先比我，仲要嗰陣先同我講個test會係意大利文，不過係mc，咁我英文好到點都好，好多字都要翻譯返做中文先明，咁都算啦，佢test根本得一半係mc，仲要test到一半無端端話原來比漏咗份我，笑！好好笑！因為呢樣野同屋企人噪，結果佢哋噪到我喊都唔停，最後係因為我抖唔到氣係咁震先停。後尾都有試過幾次無端端抖唔到氣同係咁震，差啲以為自己要死，同社工都有講過，但兩個星期先會見一次，不過每次見都好似唔記得之前講過咩咁，係重要少少嘅會記得，同埋同佢傾偈都好放鬆，雖然其實好多嘢都唔係解決到好多。
真係唔知可以點，成日都好無力，唔想溫書，乜都唔想做，已經想喊都喊唔出。
好多謝大家睇到呢到，對唔住我講嘢1999，仲有少少長氣🙇🏻♀️希望大家比少少意見🙆🏻♀️