#NSS家庭
[GUEST] 唔通得我自己一個嘅家庭係咁咩？
先介紹下背景:
小妹今年f.2 有個成年家姐，係單親家庭，跟住阿媽住。
喺我得幾歲既時候，我阿爸阿媽開始有好多嘅爭執，爭執慢慢又嘈架變成打架 ，最後變成警察上屋企。我阿爸長期外地工作，有賭博，飲酒同食煙。我啊媽喺香港自己一個養大我同我家姐，但係阿爸經常唔會主動寄錢翻嚟做生活費，搞到我阿媽次次要過去外地搵佢苦苦哀求佢，佢先俾。幾年之後，我阿爸返咗嚟香港，屬於失業狀態，佢成日換工作，又成日唔去翻工，但又會去賭博，跟住屋企多咗好多爭執 。一開始只係互相鬧交，但之後一發不可收拾，越嚟越激烈，最係仲出埋手，但我無能為力，只可以喺房間入面聽佢地嘅吵架聲，我家姐都試過出去勸架，但都係無法改變，成日將屋企搞成烏煙瘴氣。一個月會有兩三次嘈架，警察上屋企已經係家常事。之後我阿媽頂唔順提出咗離婚(距離宜家已經離咗婚四 五年)。一開始只係分房間訓，但係阿爸一直騷擾，半夜敲門，踢門。跟住我地搬咗出去租屋住，本來以為可以有安心嘅生活，只不過阿爸開始跟蹤，恐嚇，騷擾，我哋陸陸續續搬左好多次，只不過每次都俾佢搵到，越搬越遠。佢見宜家搵唔到我哋，開始信息，電話騷擾，一日打十幾個電話俾我，不斷信息騷擾，都成日發恐嚇信息「你哋小心*全家」。小妹宜家都唔知點算，希望可以俾啲意見俾小妹。