#NSS個人
[Guest] 是咁的，小妹係一個有社交恐懼症嘅人，連同朋友講下嘢都會好緊張好驚嗰隻。今年啱啱升上高中，老師開始對我哋dse緊張，又叫我哋參加多d校外活動。我原本都打算參加多d活動，當去玩下，但係次次叫朋友一齊去，佢哋又話麻煩唔去，得我自己一個我又唔敢去報名。結果次次miss咗個機會之後，見到參加嗰d人po曬相咁又會慶幸自己唔洗同一班人打交道，同時又會覺得自己好冇用，明明去參加下根本冇乜嘢，點解我會唔敢去。
其實小妹好清楚自己將來想做乜，我好想讀獸醫，大學讀獸醫其中一個條件係高中時期要去做義工。但係我又怯，驚冇人陪我一齊去做義工。見到其他人好成功嘅一面，又會覺得自己好失敗。咁我諗住先讀好書再講，又覺得自己反正都冇辦法成功，又冇曬剛勁。
我對自己嘅前路好迷茫，我唔知我宜家要做乜，同埋我係咪真係可以讀到獸醫。
我知道呢種時候應該要揾人諮詢下，但係我硬係覺得夢想呢d嘢好秘密好私人，講咗之後做唔到會俾人笑，唔敢同其他人講。同阿爸阿媽講又唔係，佢哋最鍾意攞我嚟做同保安街坊傾計嘅話題，講個秘密俾佢哋知嘅結果就係全村都知。同家姐講，我哋根本無熟，佢有佢自己嘅生活，基本上我哋一年365日都未必講到365句話。我根本唔知可以揾邊個。
其實我知道我會有呢個問題最根本嘅原因係我懶，但係我唔知點改（廢到笑sorry）。我好想劈低一切乜都唔做，做返舊垃圾。利申我完全冇自殺傾向，我仲係好努力咁讀書追夢。但係我真係唔知我應該要點樣去處理我宜家呢個心態，btw我覺得我宜家嘅心情真係好似人間失格嘅大庭葉藏（just kidding)。
我唔知我講到咁1999有冇人明，其實我都唔知我想點。但係就算冇人明，或者覺得我好莫名其妙定好廢乜都好，我只係想喺度訴說下心聲。最後多謝返哂咗幾分鐘睇呢篇文嘅你。
Admin 可唔可以幫我po喺ig thanks😊