#NSS愛情
[GUEST] 其實我咁樣係咪好唔正常…
(長文嚟希望大家畀下意見我😭)
小妹(16歲)而家同緊一個大一歲嘅男仔拍緊拖(已經1年半)，但係就成日畀人話唔正常…
–
每次要食飯個陣，我唔會想去啲貴價餐廳食飯，就算要我好似而家咁每次陪佢食30蚊頹飯都無所謂，我覺得食得飽咪得。我自己係一個追星人，同佢一齊之前，每個月起碼洗3000喺追星度，不過一齊之後我就控制下自己，因為佢本身唔係好有錢，但係佢成日同我講話要養我，我唔想畀壓力佢，仲有我覺得拍拖唔係話一定要男養女或者女養男，我覺得係雙向，所以我要儲錢一齊同佢面對，所以平時拍拖就算去公園散步我都肯㗎
–
生日或者重要節日嘅時候，我都唔想佢破費買咩kpop周邊畀我做禮物或者驚喜，我要一個擁抱同佢陪喺我身邊就已經足夠。到佢生日嘅時候，我會買啲佢鍾意嘅嘢畀佢，我知道佢平時家庭有壓力，所以我好想佢開心就買啲佢鍾意嘅嘢畀佢
–
問題嚟啦，當我身邊啲男女同學聽完上面啲說話之後就不斷話我唔正常，話我做咩拍拖唔化妝(我平時出街都唔化妝)，例如:起碼都叫佢買禮物畀你啦，名牌個啲啊！有冇搞錯啊頹飯？！等佢養你啦，我哋都係養女朋友㗎，點可以要女仔陪你捱啊?！等等嘅說話…😔😔😔甚至問我如果求婚用紙戒指求婚，我會唔會應承，講真我真係肯！如果要佢辛苦工作壓力大先買到戒指，我唔會開心囉，戒指雖然係婚姻嘅象徵，我覺得兩個人之間感情唔變咪得…就算之後啲生活都係要慳，唔可以攬名牌手袋，我都無所謂，只要佢一直陪著我就得…
–
我見到身邊啲女仔係節日嘅時候都收到啲香水，化妝品，名牌銀包個啲，我真係一啲羨慕嘅感覺都冇，銀包用得咪得，使唔使用名牌…我唔想自己另一半為咗買呢啲禮物搞到壓力大經濟出現問題…只要佢同我一齊係開心我就已經好滿足
–
不過日日畀人話我唔正常，我有啲難受😭…我真係好想知自己係唔係唔正常同埋如果單身或者拍緊拖嘅你哋點睇我呢啲人…
sorry for 1999 辛苦各位同Admin啦