#NSS社會
[guest] 現代寂寞
有無人覺得，依家要揾倒有共同興趣嘅人好難
依家你可以揀嚟做嘅嘢真喺多到不得了，玩音樂，體育，煲劇，打機… 淨係哩四種興趣嘅分支已經多到無可能數得哂。我哋可能會咩都玩少少，都幾好吖，咩都接觸下，不過摸下就算，摸下就走人。
可能係我哋摸摸下發現，𐲖，都無咩人玩嚟樣嘢嘅，之後我哋愈玩愈孤獨，最後我哋放棄咗。最後淨低堅持自己興趣嘅，只可以自己漂浮係人海之中，不斷試試運氣揾自己嘅同伴。
我哋問人：「你有無睇最近嗰套xx?」
人哋答：「無。」
之後？
無，無之後
又有無人覺得，依家換個男／女朋友太易
上Tinder 整個profile, 去ig page 投稿徵男／女朋友， 再唔係擒啲落街見倒邊個靚問佢攞ig。拍三分鐘拖，唔啱換過個，日日新鮮滾熱辣。
其實識friend 都係咁，嗰個friend 下個月移民，哩排多咗去蒲識多咗幾個鬼妹，下年轉校同啲同學啱啱熟就要走。
佢哋生日我哋會dm 佢講句：「生日快樂」
ex 嗰啲都block咗都唔理佢幾時生日。
之後？
無，無之後
我哋人生哩個鏡頭不停跳嚟跳去，快到我哋根本無可能睇倒任何一個細節，快到我哋捉唔住任何一個時刻，快到連人生嘅目的我哋都揾唔返出嚟。我哋只係跟住時間表將一個又一個嘅工序做完。星期一我返完學，補習，返到屋企開 YouTube，瞓覺，星期二我返完學… 我哋會同人講：「我好忙。」但係忙完之後呢？我哋忙咗啲咩？我哋忙完之後成績好咗？多friend 咗？有錢咗？
可能真係成績好咗，多friend 咗，有錢咗。
之後呢？
無，無之後
我哋可能都唔太記得昨日食過啲咩餸。會唔會到我哋死嘅時候，都講唔出我哋係哩個世界上做過啲咩。
純有感而發，無批評任何人嘅用意
sor for 1999